logoეს შენ გეხება

კითხვა-პასუხი

გახსოვდეთ, C ჰეპატიტი მძიმე ქრონიკული დაავადებაა და მისი მკურნალობა და მართვა მხოლოდ თქვენს მიერ არჩეული ექიმ-ჰეპატოლოგის მიერაა შესაძლებელი, რომელიც პირადად იცნობს თქვენი ჯანმრთელობის მდგომარეობას და მხოლოდ თქვენთვის საჭირო გადაწყვეტილებებს თქვენთან შეთანხმებით იღებს;

ჩვენს საიტზე გამოგვიგზავნეთ C ჰეპატიტთან დაკავშირებული ზოგადი კითხვები. ისინი ჩვენთან ანონიმურად შემოდის და მათზე პასუხებს ქვემოთ იპოვით.



კითხვა: 

C  ჰეპატიტი მაქვს 10 წელიწადია უკვე. მაშინ გავიკეთე ანალიზი (ფიბროსკანი1). რამდენად საშიშია?

 
პასუხი: 

ფიბროსკანით ფიბროზი 1, ღვიძლის დაზიანების იოლი სტადიაა, რაც, რა თქმა უნდა, სიცოცხლისათვის საშიში არაა. განაგრძეთ მეთვალყურეობა ღვიძლის დაზიანებაზე, მისი შემდგომი პროგრესირების შემთხვევაში კი განიხილეთ ანტივირუსული მკურნალობის ჩატარების საკითხი. 

 

კითხვა: 

მეუღლეს აქვს  C ჰეპატიტი (F4).  2 წლის წინ უშედეგოდ იმკურნალა. მკურნალობის დაწყებიდან 3 თვეში ვირუსმა ძალიან იკლო {მილიონიდან 3ათასამდე). შემდეგ, ფეხის ტკივილების გამო წამლის დოზა თვენახევარი  შეგვიმცირა ექიმმა. მკურნალობის 6 თვის ანალიზებში ვირუსი კვლავ გაზრდილი იყო და ექიმმა მკურნალობა შეგვაწყვეტინა. დოზის შემცირებამ გამოიწვია თუ არა ვირუსის ზრდა? შეიძლება თუ არა იგივე მკურნალობა დოზის შემცირების გარეშე? ბოლო ხანებში მუცელი გაეზარდა. ეს რისი ნიშანია? რას მირჩევთ?

 

 
პასუხი: 

 ჩანს, თქვენი მკურნალი ექიმი ანტივირუსული პრეპარატების გვერდითი ეფექტების გამოვლენის გამო გახდა იძულებული შეემცირებია პრეპარატების დოზები, რამაც, რა თქმა უნდა, უარყოფითი გავლენა იქონია მკურნალობის საბოლოო შედეგზე – პაციენტმა  ვერ მოახერხა ვირუსისაგან განთავისუფლება. განმეორებით იგივე პრეპარატებით მკურნალობის ჩატარების შემთხვევაში, დიდი ალბათობით არაა მოსალოდნელი, რომ მკურნალობა იქნება ეფექტური. თქვენს მკურნალ ექიმთან ერთად ჯერ აუცილებლად დაადგინეთ პაციენტის მუცლის ზომების მომატების მიზეზი, ამის შემდეგ, დაავადების სტადიის კიდევ ერთხელ დაზუსტებით, განიხილეთ დაავადების შემდგომი მართვის ტაქტიკა.

 

კითხვა: 

 ღვიძლზე მაქვს ორი პატარა გამონაზარდი და შეიძლება C ჰეპატიტისგან იყოს გამოწვეული?

 
პასუხი: 

არ ვიცი, რას გულისხმობთ სიტყვა “გამონაზარდში”. თუ გაქვთ ღვიძლის ჰემანგიომები ან მარტივი კისტები, რაც ძალიან ხშირია, ეს  არც C ჰეპატიტთანაა დაკავშირებული და არც საშიშია. სხვა შემთხვევები საჭიროებენ დაზუსტებას, თუ რა პათოლოგიაზეა საუბარი. 

 

კითხვა: 

ცოტა ხნის წინ ჩემს მეუღლეს დაუდგინდა C ჰეპატიტი. ურთიერთობის მერე ციკლი დამეწყო, რამდენად შესაძლებელია რომ მეც გადამდებოდა?

 
პასუხი: 

სექსუალური კონტაქტით C ვირუსის გადადების ალბათობა მინიმალურია, არ აღემატება 3-5%-ს და იგი თქვენი მეუღლის სისხლში ვირუსების რაოდენობაზეა დამოკიდებული.  სექსუალური კონტაქტით ინფექციის გავრცელება მხოლოდ მაღალი ვირემიის დროსაა შესაძლებელი [2 მილიონი და მეტი].

 

კითხვა: 

ჩემს მეგობარ მამაკაცს აქვს C ჰეპატიტი, ის მეტადონის პროგრამაშია ჩართული. ავნებს თუ არ მეტადონი მის მდგომარებას? 

 
პასუხი: 

მეტადონი, რა თქმა უნდა, მავნებელია ადამიანის ორგანიზმისათვის. მეტადონის პროგრამა გულისხმობს მის გამოყენებას მხოლოდ ჩანაცვლებითი თერაპიისათვის – ჰეროინის აბსტინენციის მოსახსნელად, კლებადი დოზით და მის აუცილებლად მოხსნას.

კითხვა: 

ჩემს ახლობელს, რომელიც 45 წლისა, აღმოაჩნდა C ჰეპატიტი (ფიბროზით ფ–3. მე–2  გენოტიპი). მაინტერესებს, რამდენად ემორჩილება ასეთი ანამნეზი მკურნალობას და რამდენად საშიშია მისი მდგომარეობა. ასევე, ხშრად აქვს ჰერპესული გამონაყარი და რამდენად აქვს კავშირი ამას დაავადებასთან.

 
პასუხი: 

C ჰეპატიტით პაციენტებში ხშირია ჰერპესული ინფექციის რეაქტივაცია, რაც კანზე გამონაყრით გამოვლინდება. არსებობს მისი სპეციფიკური მკურნალობა. გამონაყრის განვითარებისთანავე მიმართეთ ექიმ-ინფექციონისტს, რომელიც გირჩევთ, რომელი მედიკამენტი, რა დოზით და რამდენ ხანს უნდა მიიღოთ. რაც შეეხება C ვირუსის მეორე გენოტიპსა და ფიბროზის მესამე სტადიას, ასეთი მონაცემებით დიდი ალბათობითაა მოსალოდნელი ანტივირუსულ კომბინირებულ მკურნალობაზე დადებითი შედეგის მიღება [65-70% ში].

 

კითხვა: 

 

  აღმომაჩნდა C ჰეპატიტი, 3ა გენოტიპი. ვიმკურნალე პეგინტრონ-რიბავირინით. ბოლო ანალიზებით ვირუსი აღარ მაქვს, მაგრამ ალტ-ემ დაიწყო ზემოთ სვლა და ავიდა 230-ზე (როცა მკურნალობის პროცესში ჩამოსული იყო 60-ამდე). მკურნალობის დაწყებამდე ფიბროზის მეოთხე სტადია დამიდგინდა  23-ი მეტავრიით. დღეის მდგომარეობით უარესად ვგრძნობ თავს ვიდრე მკურნალობის დაწყებამდე. კერძოდ, მაქვს თავის ტკივილები, საეთო სისუსტე, მებინდება მხედველობა და ოდნავ გონებაც. პეგინტრონით მკურნალობა დავამთავრე 30 საქტემბერს, მის შემდეგ დაახლოებით 15 თუ 20 გადასხმა გავიკეთე (ფიზიოლოგიური ხსნარი ჰეპტრალთან ერთად), გადასხმების დროს ცოტა უკეთესად ვარ და შემდეგ ისევ ცუდად ვხდები. 

 
პასუხი: 

თქვენი მონაცემების მიხედვით, როგორც ჩანს, ვირუსი კი იყო მგრძობიარე ინტერფერონისადმი, მაგრამ შორსწასული ფიბროზის გამო [23 კPა], თქვენმა ორგანიზმმა ვეღარ მიახერხა ვირუსის შემდგომი გაკონტროლება. რადგან მკურნალობა აღარ გრძელდება, თქვენს მიერ აღწერილი ჩივილები აღარ შეიძლება ინტერფერონის გვერდით ეფექტებად ჩაითვალოს. მკურნალ ექიმთან შეათანხმეთ თქვენი ორგანიზმის შემდგომი კვლევების ჩატარების საკითხი.

 

კითხვა: 

ჰეპატიტთან ერთად მაქვს ვასკულიტი. მაინტერესებს, სად და როგორ შეიძლება მკურნალობა ისე,  რომ წამალმა უკუჩვენება არ მომცეს, რადგანაც მკურნალობის კურსის ჩატარებაზე წამლის რეაქციამ ძალიან ცუდ დღეში ჩამაგდო.

 
პასუხი: 

ვასკულიტი – წვრილი სისხლძარღვების ანთება - C ჰეპატიტის ღვიძლგარეთა დაზიანებაა. პაციენტები ასეთი პათოლოგიით, მძიმედ იტანენ ინტერფერონით სტანდარტულ თერაპიას. მკურნალობის შედეგები ხშირად არადამაკმაყოფილებელია.  მათთვის აუცილებელია მკურნალობის ინდივიდუალური სქემის შედგენა.  შედარებით უკეთესია შედეგები, როცა ინტერფერონოთერაპიამდე ჯერ ატარებენ ვასკულიტის მკურნალობას.

კითხვა: 

5 თვის წინ ჩემს მეუღლეს დაუდგინდა ქრონიკული ჰეპატიტი, ამასთან, აქვს მე-2 ტიპის შაქრიანი დიაბეტი. რამდენად მძიმე მდგომარეობაა? არ გვაქვს დიდი ფინანსური საშუალება. ერთმა ექიმმა გვითხრა, რომ ტაქტივი 20 ამპულა გაიკეთოს, ძალიან კარგია დროებითო. თქვენ რას გვირჩევდით ამ მედიკამენტთან დაკავშირებით? 

 
პასუხი: 

ორ ათეულ წელზე მეტია ტაქტივით მკურნალობა აღარ გამოიყენება, რადგან დადგინდა, რომ იგი  უეფექტოა C ჰეპატიტის სამკურნალოდ. თქვენი მეუღლისათვის ანტივირუსული მკურნალობის ჩატარებამდე მდგომარეობის სტაბილიზაციისათვის უმნიშვნელოვანესი იქნება: სისხლში შაქრის დონის კონტროლი და მისი ნორმალურ მაჩვენებლებზე შენარჩუნება, ცხოვრებისა და კვების რეჟიმის ზედმიწევნით დაცვა, ზომიერი ფიზიკური აქტივობა, წონის კორექცია[თუ ეს საჭიროა] , ღვიძლის დაზიანების სტადიაზე მონიტორინგი და და ა.შ.

 

კითხვა: 

ვარ C ჰეპატიტის მატარებელი. შეიძლება თუ არა ერთმანეთში არეული თაფლი და კარაქი ვჭამო, რაიმე საზიანო ხომ არ არის?

 
პასუხი: 

პირველ რიგში, ტერმინი “ვირუსმტარებელი” C ჰეპატიტით ავადმყოფის მიმართ არ იხმარება. თქვენი დიაგნოზია – C ჰეპატიტის ქრონიკული ფორმა. რაც შეეხება კარაქსა და თაფლს, ეს საკვები პროდუქტები შეიძლება მიიღოთ როგორც ერთად, ისე დღის მანძილზე ცალ-ცალკე, არა უმეტეს 30-50 გრ დღეში.

 

კითხვა: 

ახლახან შევიტყვე, რომ C ჰეპატიტი მაქვს. მკერდზე შევნიშნე წვრილი წითელი წერტილები. ეს რას ნიშნავს, საშიშია?

 
პასუხი: 

არ წერთ თქვენი დაავადების სტადიის შესახებ. სხეულზე წვრილი წითელი გამონაყარი შესაძლოა საერთოდ არ იყოს ჰეპატიტთან დაკავშირებული. ჯერ გაიარეთ კონსულტაცია კანის ექიმთან.

კითხვა: 

ვიცი, რომ C ვირუსის გამრავლებას ჯერჯერობით მხოლოდ ინტერფერონით მკურნალობა აფერხებს. ვისაც ექიმთან მისვლის, ანალიზების აღების და მკურნალობის საშუალება არა გვაქვს, შეიძლება თუ არა, რომ ექიმთან კონსულტაციის გარეშე მივიღოთ ღვიძლის გამწმენდი ბალახეული საშუალებები?

 
პასუხი: 

საჭირო არაა მდგომარეობის დრამატიზება. დღეს ჩვენს ქვეყანაში ექიმთან ვიზიტი დიდი პრობლემა არაა.ამასთან, ექიმის დანიშნულების გარეშე რაიმე სამკურნალო საშუალების, მათ შორის სამკურნალო ბალახების მიღებას არ გირჩევთ. თვით მკურნალობას თავად შეუძლია თქვენი ჯანმრთელობისათვის ზიანის მიყენება, ამასთან,შეიძლება დაიკარგოს დრო, რომლის ანაზღაურება მერე ძლიერმომქმედი საშუალებებითაც აღარ იქნება შესაძლებელი.

კითხვა: 

C ჰეპატიტით დაავადებულისათვის თუშეიძლება ფეხბურთის თამაში კვირაში 2-ჯერ და სავარჯიშო დარბაზში ვარჯიში?

 
პასუხი: 

ინფიცირებულისათვის სასარგებლო აყოველდღიური 45-60 წთ-იანი ვარჯიში სავარჯიშო დარბაზში, სპორტული სიარული, ცურვა. მაინც ვფიქრობ, ფეხბურთის თამაში დიდი ფიზიკური დატვირთვაა და ამიტომ არ გირჩევთ.

კითხვა: 

5 წლის წინ წარმატებით ვიმკურნალე C ჰეპატიტზე და ვირუსი გაიყინა. ერთი პრობლემა დამრჩა - ღვიძლის გაცხიმოვნება (წონაში დაკლება მიჭირს). მინდა შვილის გაჩენა. შეიძლება?

 
პასუხი: 

დიახ,თქვენთვის შვილოსნობა [ორსულობა და მშობიარობა] შესაძლებელია. 

კითხვა: 

მაქვს B ჰეპატიტი ჟილბერის სინდრომით, ვმუშაობ ბენზინგასამართ სადგურზე. რამდენად მავნეა ეს ჩემთვის?

 
პასუხი: 

ბენზინ გასამართ სადგურზე თქვენი მუშაობა თქვენი ჯანმრთელობის მდგომარეობას არ გააუარესებს.

კითხვა: 

ნახევარწლიანი მკურნალობის კურსი დავამთავრე vირუსების რაოდენობით 186000. ესე იგი, მკურნალობა უშედეგოა? რა მოვიმოქმედო?

 
პასუხი: 

თქვენ აღმოჩნდით ინტერფერონოთ ერაპიაზე არამოპასუზე. არაა მოსალოდნელი, რომ მკურნალობის შემდგომი გაგრძელებით განთავისუფლდებით ვირუსისაგან, ამიტომ: დაუყოვნებლივ შეწყვიტეთ ანტივირუსული თერაპია, ამის შემდეგ კი განაგრძეთ ჯანმრთელი ცხოვრების წესით ცხოვრება. 2015 წლისათვის უკვე ხელმისაწვდომი იქნება ახალი, უფრო ეფექტური ანტივირუსული პრეპარატები. მათი მიღების შემდეგ, დიდი ალბათობით შესაძლებელი გახდება თქვენი სრულად განკურნება.

კითხვა: 

მაქვს C ჰეპატიტი ციროზის სტადიაზე. ორჯერ გავიკეთე ლიგირება. შეიძლება მკურნალობას დავუმატო „კამელინი“?

 
პასუხი: 

როგორც ჩანს,თქვენი დაავადება გართულებულია საყლაპავის ვენების ვარიკოზული გაგანიერებით. პირველ რიგში საკონტროლო გასტროსკოპია ჩაიტარეთ იმ ინტერვალით, რა რეკომენდაციასაც გაძლევთ ექიმი-ენდოსკოპისტი. ამის გარდა,სისტემატურად შეიმოწმეთ ღვიძლის ფუნქციები, განსაკუთრებით მნიშვნელოვანია თქვენთვის პროთრომბინის ინდექსის კონტროლი და მისი მაჩვენებლის კორექცია, რათა არ განვითარდეს ვარიკოზიდან სისხლდენა. რაც შეეხება კამელინს, ვფიქრობ ქვენთან მიმართებით მისი მიღება არაფრით გამართლებული არაა.

კითხვა: 

რას ნიშნავს ღვიძლის დონორი? ახლობელს შეუძლია დონორობის გაწევა? მისთვის ეს საზიანო ხომ არ იქნება?

 
პასუხი: 

ღვიძლის დონორი ნიშნავს ღვიძლის დაავადებების ტერმინალურ- ბოლო სტადიაზე მყოფი პაციენტისათვის გადასანერგი ორგანოს წყაროს. ღვიძლის დონორი შეიძლება იყოს გვამური ორგანო ან ცოცხალი ადამიანის ღვიძლის ნაწილი. ავადმყოფისათვის ცოცხალი ღვიძლის საუკეთესო დონორი ახლო ნათესავია. დონორი უნდა იყოს ახალგაზრდა, ჯანმრთელი, არ უნდა ჰქონდეს ღვიძლის დაავადება, მათ შორიც არც გაცხიმება. უმეტეს შემთხვევაში დონორისათვის ღვიძლის ნაწილის ამოკვეთა არაა ზიანის მომტანი[ღვიძლის დიდი რეგენერაციული-აღდგენითი უნარის გამო],ამასთან,ლიტერატურაში აღწერილია ღვიძლის დონორებში მძიმე, მათ შორის სიცოცხლისათვის საშიში გართულებების განვითარების შემთხვევებიც, თუმცა ეს ძალზე იშვიათია.

კითხვა: 

30 წლის ვარ, ვიცავ დიეტას და არ ვეკარები ალკოჰოლს. სამაგიეროდ, ვეწევი დღეში 1 კოლოფ სიგარეტს და მარიხუანას კვირაში სამჯერ. რამდენად საზიანოა, ეს უწყობს ხელს ვირუსის გამრავლებას?

 
პასუხი: 

მარიხუანა და  ნიკოტინი დადასტურებულად უარყოფითად მოქმედებს ღვიძლის ფუნქციებზე. ძლიერდება თუ არა მათი მოქმედებით ვირუსის გამრავლება,ცნობილი არაა.ასეთი კვლევები არ ჩატარებულა.

კითხვა: 

მეუღლეს აქვს 1b გენოტიპი, f4, პერიოდულად აწუხებს უჰაერობა და სისუსტე. არადა, ასთმა არა აქვს და ჟანგბადის მიწოდებაც ორგანიზმში ნორმალურია. შეიძლება ასეთი სიმპტომები ღვიძლისგან იყოს გამოწვეული თუ ეს ნევროზულია?

 
პასუხი: 

თქვენს მიერ აღწერილი კლინიკური ნიშნები: საერთო სისუსტე, უღონობა და შრომის უნარის დაქვეითება,ასევე ჰაერის უკმარისობა უმნიშვნელო ფიზიკური დატვირთვი სშემდეგ  - ქრონიკული ჰეპატიტის ყველაზე ხშირი სიმპტომებია და პაციენტთა 80%-ს აღენიშნება.

კითხვა: 

მითხრეს, რომ ბილირუბინი მაქვს მომატებული. რას ნიშნავს ბილირუბინი, ეს საშიშია?

 
პასუხი: 

ჯერ ბილირუბინის შესახებ: ბილირუბინი ნივთიერებაა, რომლის წარმოქმნ აორგანიზმში მუდმივად ხდება სისხლში ცილა-ჰემოგლობინის დაშლის შედეგად. სისხლში წარმოშობილი ბილირუბინი ტოქსიკური პროდუქტია და მისი გაუვნებელყოფა ღვიძლის უჯრედებში ხორციელდება. შემდგომში ღვიძლში წარმოშობილი არატოქსიკური ბილირუბინი სანაღვლე სისტემით ნაწლავებში ხვდება და განავლითა და შარდით გამიოყოფა ორგანიზმიდან. სისხლში ბილირუბინი მატულობს, როცა: 

1.გაძლიერებულია ერითროციტების დაშლა [ჰემოლიზურიდაავადება ან სინდრომი];

2. შეფერხებაა სანაღვლე გზებში [კენჭი ან სიმსივნე];

3. დაზიანებული აღვიძლი [მწვავე ან ქრონიკული ჰეპატიტი, ან ღვიძლის ციროზი].


ასე რომ, თქვენს შემთხვევაში დასადგენია ბილირუბინის მომატების მიზეზი, მისი ხარისხი, ტიპი-რომელი ფრაქციაა უპირატესად მომატებული და მხოლოდ ყოველივე ამის შემდეგ იქნება შესაძლებელი იმის განსაზღვრა, რამდენად საშიშია ეს.

 

კითხვა: 

ღვიძლი დაზიანებული მაქვს ფუნქციურად. შეიძლება გადადუღებული ღვინო მივიღო?

 
პასუხი: 

თერმული დამუშავების – გადადუღების შემდეგ ღვინო, მართალაც კარგავს ალკოჰოლს, მაგრამ ამასთან ერთად კარგავს მასში შემავალ, ორგანიზმისათვის სასარგებლო ნივთიერებების უდიდეს ნაწილსაც.ძირითადად რჩება შაქარი, რისი დიდი რაოდენობით მიღება ორგანიზმისათვის საზიანოა. ამდენად, გადადუღებული ღვინის მიღებას თქვენთვის არავითარი სარგებლის მოტანა არ შეუძლია.

კითხვა: 

რატომ ვერ ვიღებ ჩემს ყველა კითხვაზე პასუხს?

 
პასუხი: 

საიტზე შემოსულ, მხოლოდ C ჰეპატიტთან დაკავშირებულ კითხვებს პასუხობს პროფესიონალი ექიმი-ჰეპატოლოგი. ის პაციენტის მდგომარეობის პირადი შესწავლის გარეშე არ განიხილავს კონკრეტული ანალიზების პასუხებს, არ აფასებს სხვა ექიმის მიერ დანიშნული მკურნალობის ავ-კარგიანობას, არ სვამს დიაგნოზს. ამდენად, შესაძლებელია, თქვენს მიერ გამოგზავნილ ზოგ კითხვაზე კონკრეტული პასუხი ვერ მიიღოთ, ან შესაძლოა, დაახლოებით თქვენი კითხვის მსგავს კითხვაზე პასუხი საიტზე უკვე დევს. თუ მაინც გაინტერესებთ უფრო მეტი ინფორმაციის მიღება, დარეკეთ C ჰეპატიტის პაციენტთა გაერთიანების ცხელ ხაზზე 10-დან 6 საათამდე ორშაბათიდან პარასკევის ჩათვლით: 2 904 400 

კითხვა: 

რა აზრის ხართ ოზონოთერაპიით მკურნალობაზე?

 
პასუხი: 

ოზონით C ჰეპატიტის მკურნალობაზე არაა ჩატარებული კლინიკური კვლევები, ამდენად არც მისი ეფექტურობის შესახებაა რაიმე ცნობილი.

კითხვა: 

ერთდროულად მაქვს ტუბერკულიოზი და C ჰეპატიტი. მაინტერესებს, შემიძლია თუ არა ჩავიტარო მკურნალობის კურსი ინტერფერონით?

 
პასუხი: 

აქტიური ტუბერკულოზით ავადმყოფისათვის C ჰეპატიტის საწინააღმდეგო ანტივირუსული მკურნალობის ჩატარება არ შეიძლება. ასეთი პაციენტის მართვა გულისხმობს ჯერ ანტიტუბერკულოზურ მკურნალობას, მხოლოდ ამის შემდეგ წყდება ინტერფერონო თერაპიის ჩატარების აუცილებლობის საკითხი. 

კითხვა: 

მაინტერესებს, რა განსხვავებაა ინტერფერონ ალფა2 ბ და ინტერფერონ ალფას შორის

 
პასუხი: 

ინტერფერონი ალფა-2ა [პეგასისი] და ინტერფერონი ალფა-2ბ [პეგინტრონი] ალფა ინტერფერონის ქვეტიპებია. ისინი ფორმულით ერთმანეთისაგან უმნიშვნელოდ განსხვავდებიან. ორივე გენური ინჟინერიის პროდუქტია, თუმცა რამდენადმე განსხვავებული ტექნოლოგიით მიღებული, ამასთან, დადასტურებულია, რომ ორივე პრეპარატს პრაქტიკულად ერთნაირი ანტივირუსული აქტივობა აქვს. 

კითხვა: 

ც ჰეპატიტთან ერთად მაქვს ხერხემლის დისკოზიც. პერიოდულად ვიკეთებ მასაჟებს, ვიღებ იოდ-ბრომიანი წყლის აბაზანებს უჯარმაში. ავნებს თუ არა ეს ღვიძლს?

 
პასუხი: 

მასაჟებსა და თერმული აბაზანის პროცედურებს  შეუძლიათ გამოიწვიონ ღვიძლში არსებული პათოლოგიური პროცესის გამწვავება, ამიტომ პერიოდულად აუცილებლად შეიმოწმეთ ღვიძლის მდგომარეობა.   

კითხვა: 

როდესაც კენჭი არის ნაღველში, ღვიძლის ფუნქცია ირღვევა? იშლება კენჭი თუ აუცილებლად ამოსაღებია?

 
პასუხი: 

ღვიძლის ფუნქციები ნაღვლ-კენჭოვანი დაავადების დროს ირღვევა დაავადების გართულებულ სტადიაზე.  რაც შეეხება ნაღვლის კენჭების მკურნალობას, ნაღვლის ბუშტის მხოლოდ რბილი, ქოლესტერინული კენჭები, ისიც მცირე ზომის შესაძლებელია დაიშალოს მედიკამენტური მკურნალობით [ურსო დეოქსიქოლის მჟავას მიღებით], სხვა სახის კენჭების შემთხვევაში აუცილებელი ხდება ოპერაციული ჩარევა.

კითხვა: 

ჩემს მეუღლეს 2010 წელს აღმოაჩნდა ცე ჰეპატიტი (ფიბროზი 4). ალბუმინის გადასხმებს თუ არ ჩავთვლით, საფუძვლიან მკურნალoბას ვერ ვიტარებთ. მეუღლეს ასევე აქვს დიაბეტი. რას უნდა ველოდოთ მომავალში თუ მკურნალობას ვერ ჩავიტარებთ?

 
პასუხი: 

ფიბროზი 4-ის შემდეგ ღვიძლის ციროზის სტადიაა. შასურველია შემდეგი სტადიის დადგომამდე ჩაიტაროთ ანტივირუსული თერაპია.

კითხვა: 

რა სტადიები გააჩნია ციროზს და რას ეძახიან მათ?

 
პასუხი: 

ღვიძლის ციროზის რამდენიმე კლასიფიკაცია არსებობს. მათ შორის კლინიკებში ყველაზე ხშირად იყენებენ ე.წ.ჩაილდ-პუს კლასიფიკაციას [მეცნიერების გვარებია]. ფასდება სამი ლაბორატორული მონაცემი [ბილირუბინი, ალბუმინი და პროთრომბინი] და ორი კლინიკური ნიშნის არსებობა: ასციტისა და ენცეფალოპათიის. ამ კლინიკურ-ლაბორატორული მაჩვენებლების დარღვევის სიმძიმე ფასდება ქულებით.  გამოყოფენ ციროზის სამკლასს: A , B, და C.A და B კლასისციროზი –კომპენსირებულია, C –დეკომპენსირებული.

კითხვა: 

მაინტერესებს, მოქმედებს თუ არა უარყოფითად მზე და ზღვა C ჰეპატიტზე?

 
პასუხი: 

C ჰეპატიტით პაციენტისათვის მზეზე გარუჯვა უკუნაჩვენებია. რაც შეეხება ზღვაში ცურვას, დაავადების ქრონიკული ანთების სტადიაზე [ციროზის გარეშე] სასარგებლოა, ოღონდ დღეში 45-60 წთ.

კითხვა: 

მაქვს C ჰეპატიტი (მეორე გენოტიპი), გავდივარ მკურნალობის კურსს პეგასისითა და კოპეგუსით (გაკეთებული მაქვს 6 ნემსი). ფეხზე შევნიშნე პატარა გამონაყარი, რომელიც ექიმს ვაჩვენე. მან ჩათვალა, რომ ეს შესაძლებელია მწერის ნაკბენი ყოფილიყო. თუმცა, ერთი კვირა გავიდა და მაინც მაქვს ეს პრობლემა. არის თუ არა შესაძლებელი, რომ იგი წამლის რეაქციით იყოს გამოწვეული?

 
პასუხი: 

კომბინირებული ანტივირუსული მკურნალობის დროს სპაციენტთა 16-24%-ს უნვითარდება დერმატიტის [კანის ანთება] ან კანზე სხვადასხვა სახის გამონაყარი [პეგინტრონისა და პეგასისის ინსტრუქციები]. თუმცა, ეს საშიში არაა და არც მკურნალობის საბოლოო შედეგზე აქვს გავლენა.

კითხვა: 

რა სახის გამოკვლევები არსებობს C ჰეპატიტით დაავადებულისათვის, რათა ბოლომდე და საფუძვლიანად დადგინდეს მისი ღვიძლის მდგომარეობა?

 
პასუხი: 

კვლევები მოიცავს ორ ეტაპს:
 I ეტაპი:
-  სისხლში  ანტი HCV-ს განსაზღვრა ELIZA 3 -ით. ამით ხდება C ვირუსით ინფიცირების ფაქტის დადგენა.

-  სისხლის ბიოქიმიური გამოკვლევა. იგი მოიცავს:
ა] ღვიძლის ანთების ხარისხის განსაზღვრას ალანინ - ამინოტრანსფერაზას ALT,  ასპარტატ – ამინოტრანსფერაზას AST  და გამა-გლუტამილტრანპეპტიდაზას  GGT  აქტივობით.

ბ] ღვიძლის ფუნქციების: საერთო ბილირუბინისა და მისი ფრაქციების, საერთო ცილისა და ალბუმინის, აგრეთვე პროთრომბინის დროის განსაზღვრას.

 - მუცლის ღრუს ორგანოების ექოდოპლეროგრაფია. ისაზღვრება ღვიძლისა და ელენთის გადიდების ხარისხი, სანაღვლე სისტემისა და პანკრეასის დაზიანება, ღვიძლის სისხლძარღვების დაზიანება და  სისხლის ნაკადის ცვლილება.

II ეტაპი:
-  ვირუსოლოგიური – მოლეკულურ-გენეტიკური კვლევა. ტარდება პოლიმერიზაციის ჯაჭვური რეაქცია: მოიცავს ვირუსის აღმოჩენას სისხლში [თვისობრივი PCR], მისი რაოდენობის დადგენას [რაოდენობრივი  PCR] , აგრეთვე გენოტიპირებას [C ვირუსის ტიპის დადგენას].

-  ღვიძლის ფიბროელასტოგრაფია – ისაზღვრება ღვიძლის სიმკვრივე [მასში ფიბროზის - შემაერთებელი ქსოვილის  განვითარების ხარისხი].

საჭიროების შემთხვევაში დამატებით ტარდება ღვიძლის პუნქციური ბიოფსია [ისაზღვრება ღვიძლის ქსოვილის მორფოლოგიური ცვლილებები]. 

კითხვა: 

რამდენი ხანი სჭირდება ვირუსს, რომ ციროზის სტადიამდე დააზიანოს ღვიძლი, თუ პაციენტი ალკოჰოლს არ ეკარება?

 
პასუხი: 

ალკოჰოლი დაავადების პროგრესირების ერთ-ერთი უმნიშვნელოვანესი, მაგრამ არა ერთადერთი ფაქტორია. არსებობს დაავადების აგრესიული მიმდინარეობა [მართალია არც თუ ხშირად], როცა ყოველგვარი მაპროვოცირებელი ფაქტორების გარეშე პათოლოგიური პროცესი ღვიძლში სწრაფად პროგრესირებს.  იმ პაციენტებმაც, ვინც სრულად უარი თქვეს ალკოჰოლზე,  უნდა გააგრძელონ დაავადების მიმდინარეობაზე მონიტორინგი-მეთვალყურეობა. ღვიძლის ციროზი C ვირუსით ინფიცირებიდან 15-30 წელიწადში ვითარდება.

კითხვა: 

თუ ადამიანს არა აქვს საშუალება რომ იმკურნალოს, რა უნდა გააკეთოს იმისათვის, რომ ვირუსმა სავალალო შედეგამდე არ მიიყვანოს?

 

 
პასუხი: 

პირველ რიგში, დაადგინეთ თქვენი დაავადების სტადია. იქნებ, საერთოდ არ გჭირდებათ ანტივირუსული მკურნალობა. მეორე, იცხოვრეთ ჯანმრთელი ცხოვრების წესით, მოერიდეთ ჰეპატოტოქსიკურ პრეპარატებსა და სტრესს. ეს უკანასკნელი ღვიძლის ერთ-ერთი სერიოზული დამაზიანებელი ფაქტორია.

კითხვა: 

რა გავლენა აქვს ნიკოტინს C ჰეპატიტზე?

 
პასუხი: 

ერთმნიშვნელოვნად უარყოფითი. ჩატარებულია კვლევა, რომლის შედეგების მოხედვით, C ჰეპატიტით იმ პაციენტებს, ვინც ჭარბად ეტანება ალკოჰოლს და თანაც თამბაქოს აქტიური მომხმარებელია, 40-ჯერ ეზრდებათ ღვიძლუჯრედული კიბოს განვითარების რისკი. 

კითხვა: 

მაინტერესებს, წარმატებული  ინტერფერონოთერაპიის შემდეგ ექვემდებარება თუ არა ღვიძლი აღდგენას (თერაპიის დაწყების წინ ფიბროზი მქონდა მეოთხე სტადია მეტავრით) და რა დრო დასჭირდება ამას? 

 
პასუხი: 

ღვიძლის ფიბროზის მეოთხე სტადიაზე მყოფი პაციენტები წარმატებული ანტივირუსული მკურნალობის შემთხვევაშიც [ვირუსმა შეწყვიტა გამრავლება – ანუ შემდგომი დაზიანება], მაინც აუცილებლად საჭიროებენ ჰეპატოლოგის მეთვალყურეობის გაგრძელებას ღვიძლის პარენქიმის უკვე არსებული სერიოზული დაზიანების გამო. ფიბროზის პროგრესირების შეჩერება შესაძლებელია, ღვიძლის ქსოვილის დაზიანების სრულად აღდგენა - სამწუხაროდ, არა.

კითხვა: 

თუ მკურნალობენ უფასოდ საქართველოში, რაიმე პროგრამა ხომ არ არსებობს ამისათვის ან რომელიმე სადაზღვევო კომპანია ხომ არ აფინანსებს ანალიზებს ან მკურნალობას და სად?

 
პასუხი: 

უფასოდ არსად და მათ შორის ჩვენთანაც, არავის არ მკურნალობენ. თქვენ ალბათ გაინტერესებთ, ვინმეს თუ უნაზღაურებენ და ვინ ანაზღაურებს ანტივირუსულ მკურნალობასთან დაკავშირებულ ხარჯებს. როგორც ჩემთვისაა ცნობილი, საქართველოში მომუშავე არც ერთი სადაზღვევო კომპანიის მომსახურების პაკეტებში C ჰეპატიტის ანტივირუსული მკურნალობა  შეტანილი არაა. მკურნალობის ხარჯებს თავიანთ თანამშრომლებს უნაზღაურებენ სხვადასხვა საერთაშორისო და მსხვილი  კომპანიები, საელჩოები და სხვ. 

კითხვა: 

სისხლის საერთო ანალიზი რაიმე ცვლილებას ანახებს იმ შემთხვევაში, თუ C ჰეპატიტი მაქვს?

 
პასუხი: 

ქრონიკული C ჰეპატიტის დროს პერიფერიულ სისხლში რაიმე სპეციფიკური ცვლილებები გამოხატული არაა. ცვლილებები ვითარდება ღვიძლის ციროზის სტადიაზე: ჯერ მცირდება თრომბოციტების რაოდენობა, უფრო მოგვიანებით, კი ლეიკოციტებისა და ერითროციტების რაოდენობაც.

კითხვა: 

ჩემს მეუღლეს აღმოაჩნდა მწვავე C ჰეპატიტი. ექიმებმა უმკურნალეს, მაგრამ არა ანტი ვირუსული პრეპარატით. რამდენად შესაძლებელია, რომ ამგვარი მკურნალობით გაქრეს ვირუსი?

 
პასუხი: 

დაავადების მწვავე ფაზაში ინფიცირებულთა 20-50% თვითიკურნება ანუ თავისუფლდება ვირუსისაგან. ასე რომ, სავსებით შესაძლებელია თქვენი მეუღლე თვითგანკურნებულიყო და არა იმიტომ, რომ რაღაც პრეპარატებს იღებდა. იმ პაციენტებს კი, ვინც ინფიცირებიდან 16 კვირაზე ვერ შეძლო ვირუსისაგან განთავისუფლება, უტარდებათ პეგილირებული ინტერფერონით მკურნალობის 6 თვიანი კურსი. მწვავე C ჰეპატიტით პაციენტთა განკურნების ალბათობა ძალზე მაღალია -100%-დე.

კითხვა: 

რა ღირს საქართველოში C ჰეპატიტის სრული გამოკვლევა?

 
პასუხი: 

ქრონიკულ C ჰეპატიტზე გამოკვლევა ხდება ეტაპობრივად, პირველადი სკრინინული კვლევა – სისხლში ვირუსის საწინააღმდეგო ანტისხულების დადგენა ღირს  2-3 ათეული ლარი [ტესტ-სისტემაზე დამოკიდებულებით]. ანთების მაჩვენებლების [ალტ, ასტ, გ-გტ]  და ღვიძლის ფუნქციების [ბილირუბინიფრაქციებით, ალბუმინი, პროთრომბინი]  განსაზღვრა 80-120 ლარი. ღვიძლის ექოდოპლეროგრაფია 50-60 ლარი. C ვირუსის რაოდენობის და გენოტიპის განსაზღვრა -800-850 ლარი.

კითხვა: 

ჩემმა ახლობელმა ოთხი წლის წინ ჩაიტარა მკურნალობა C ჰეპატიტზე. აინტერესებს, კიდევ შეიძლება იჩინოს თავი ამ დაავადებამ?

 
პასუხი: 

თუ მკურნალობის 12, 24 და 48 კვირაზე პაციენტს სისხლში ვირუსი აღარ აღმოაჩნდება და ასევე ვირუსზე პასუხი უარყოფითია კიდევ მკურნალობის დასრულებიდან 24 კვირისშემდეგაც, ითვლება, რომ ამ შემთხვევაში მიღწეულია ე.წ.მყარი ვირუსული პასუხი [SVR]. ეს პაციენტი სრულადაა განკურნებული ინფექციისაგან და მისი გამწვავება აღარ მოხდება.

კითხვა: 

ჩემი მეუღლე ინფიცირებულია C ჰეპატიტით, სასმელს არ სვამს, მაგრამ დამოკიდებულია ბაგაბამის ტაბლეტებზე (დღეში 2-3 აბი), მის გარეშე ენერგია არა აქვს და ვერაფერს აკეთებს. ვიცი რომ მავნეა, მაგრამ რამდენად?

 
პასუხი: 

სამწუხაროდ თქვენი მეუღლე ტოქსომანია და ეს მისი ორგანიზმისათვის ძალიან ცუდია.

კითხვა: 

მაქვს ციროზი. აქვს თუ არა აზრი ინტერფერონით მკურნალობას?

 
პასუხი: 

ღვიძლის ციროზის ადრეულ, კომპენსირებულ სტადიაზე შესაძლებელია ჩატარდეს ანტივირუსული თერაპია. თუმცა, ასეთ პაციენტებში ხშირია მკურნალობის  გვერდითი ეფექტები, საჭირო ხდება პრეპარატების დოზების შემცირება ან შეწყვეტა, რის გამოც მკურნალობის შედეგები უარესია.  

კითხვა: 

 ჩემი მეუღლე C ჰეპატიტითაა დაავადებული. დაფეხმძიმების შემთხვევაში რა რისკები არსებობს?

 
პასუხი: 

C ვირუსით ინფიცირებული  ორსული ქალების 95-97%-ში ბავშვი არ ინფიცირდება.

 

მუცლადყოფნის პერიოდში ნაყოფის ინფიცირების ალბათობა მაღალია იმ ქალებში, რომლებსაც სისხლში ვირუსების ძალიან მაღალი შემცველობა აღენიშნებათ, აგრეთვე აივ-შიდსით ინფიცირებულებში. ინფიცირებული დედის ახალშობილს სისხლში  უკვე აქვს C ვირუსის საწინააღმდეგო ანტისხეულები (რომელიც დედისაგან მიიღო მუცლადყოფნის პერიოდში). დედის ანტისხეულები  ბავშვში  საშუალოდ 18 თვის ასაკამდე ცირკულირებენ. იმის დადგენა, კონკრეტულად დაინფიცირდა თუ არა დედისაგან ბავშვი,  18 თვის ასაკამდე შესაძლებელია მხოლოდ  ბავშვის სისხლში C ვირუსის გენეტიკური მასალის აღმოჩენით [PCR რეაქცია]. 18 თვეზე მეტი ასაკის ბავშვის სისხლში  C ვირუსის საწინააღმდეგო ანტისხეულების არსებობა[ანტი HCV]  უკვე დიდი ალბათობით მისი  მუცლადყოფნის პერიოდში დაინფიცირების მაჩვენებელია. 

თუკი თქვენი მეუღლე ჯერ იმკურნალებს და მკურნალობა წარმატებული აღმოჩნდება, კომბინირებული ანტივირუსული მკურნალობის დასრულებიდან  6 თვის შემდეგ ორგანიზმი სრულად იქნება განთავისუფლებული პრეპარატებისაგან. თუმცა, რეკომენდაციებით, დაორსულება ნებადართულია მკურნალობის დასრულებიდან მხოლოდ 1 წლის შემდეგ. წარსულში ინტერფერონოთერაპიას ორსულობაზე ან ნაყოფის განვითარებაზე უარყოფითი გავლენა არა აქვს.

 

 

კითხვა: 

ეჭვი მაქვს, რომ C ჰეპატიტი გადამედო, რა ვქნა?... რაზე მიუთითებს ჩემი ანალიზები?.. ასეთი მკურნალობით განვიკურნებოდი?... დიაგნოზი ვერ დაუდგინეს და შეიძლება C ჰეპატიტი ჰქონდეს?.. ინფიცირებული ვარ და რა სახის გამოკვლევები უნდა ჩავიტარო?... რა სიმპტომები უნდა მქონდეს, რომ ეჭვი მოვიტანო C ჰეპატიტზე?.. გთხოვთ განმიმარტოთ, რას ნიშნავს ჩემი ანალიზის პასუხი, ეს ძალიან საშიშია?... 

 
პასუხი: 

როდესაც ოდნავი ეჭვი მაინც გაქვთ, რომ რომ C ჰეპატიტით დაინფიცირდით (თუნდაც ეს ეჭვი უსაფუძვლო იყოს), თავს ნუ იტანჯავთ, გაიკეთეთ პირველადი ანალიზი ანტისხეულებზე. ეს შესაძლებელია საქართველოს ყველა დიდ ქალაქსა და რაიონულ ცენტრში და მისი ფასი შედარებით ხელმისაწვდომია (10-დან 20 ლარამდე მერყეობს).

ქრონიკული C ჰეპატიტი საკმაოდ მძიმე და რთული დაავადებაა და თვითნებურად მისი სიმპტომების ძებნას, სხვადასხვა ანალიზების აღებას და მერე მათ ინტერპრეტაციას ნუ შეუდგებით. მითუმეტეს, დაუშვებელია მისი თვითნებურად მკურნალობა, რამაც შესაძლებელია სერიოზულად დაგიზიანოთ ჯანმრთელობა. იმ შემთხვევაშიც, თუ თქვენ სხვადასხვა მიზეზით არ აპირებთ მკურნალობას (მაგ: არა გაქვთ მკურნალობისათვის საჭირო თანხა), მაინც მიმართეთ ექიმ-ჰეპატოლოგს, რომელიც შეაფასებს თქვენი ჯანმრთელობის მდგომარეობას და გასწავლით დაავადების მართვას (როგორი დიეტა უნდა დაიცვათ, როგორი რეჟიმით უნდა იცხოვროთ და ა.შ.).

შესაბამისად, ყველა ანალიზი უნდა დაგინიშნოთ და მისი პასუხი განგიმარტოთ თქვენმა მკურნალმა ექიმმა, რომელიც მხოლოდ თქვენი მდგომარეობის გათვალისწინებით მიიღებს გადაწყვეტილებებს. თუ თქვენს ექიმს არ ენდობით, თავიდანვე შეცვალეთ იგი თქვენთვის მისაღები კანდიდატურით და შემდგომ მიჰყევით მის რჩევებს თუ დანიშნულ მკურნალობას.

კითხვა: 

ვარ 52 წლის. უკვე თითქმის 2 წელია მეტადონს ვსვამ. ამ ხნის განმავლობაში წარმატებით გავიარე ინტერფერონ თერაპიაც. მაინტერესებს, თუ შეიძლება ხანგრძლივად მეტადონის მიღება და რამდენად მოქმედებს იგი ნამკურნალებ ღვიძლზე?

 
პასუხი: 

მეტადონი ტოქსიკური პროდუქტია და მისი ხანგრძლივად მიღება ერთმნიშვნელოვნად უარყოფითად მოქმედებს ადამიანის ორგანიზმზე, განსაკუთრებით ღვიძლსა და თავის ტვინზე.

კითხვა: 

როდის არის მიზანშეწონილი მკურნალობის დაწყება: თავიდანვე, სანამ ვირუსს ღვიძლი არ დაუზიანებია თუ მაშინ, როდესაც ის ღვიძლის დაზიანებას დაიწყებს?

 
პასუხი: 

ანტი ვირუსული მკურნალობის დაწყება რეკომენდებულია ღვიძლის ფიბროზის ადრეულ სტადიაზე – F1- F2.
ამ დროს ვლინდება პრეპარატების მაქსიმალური ეფექტი. შედეგები მნიშვნელოვნად უარესია შორსწასული ფიბროზის სტადიებზე – F3-F4. დაუზიანებელ ღვიძლზე F0 – ანტივირუსული მკურნალობა არ ტარდება.

კითხვა: 

ჩემს მეუღლეს 3 წლის წინაღმოაჩნდა C ჰეპატიტი (1 გენოტიპი). თითქმის 1 წელი იმკურნალა უშედეგოდ. როდის შეიძლება ტელაპრევირით მკურნალობა, რამდენი ხანი უნდა გავიდეს? აქვს თუ არა მას მეორედ მკურნალობისას განკურნების შანსი? და კიდევ, ამ უშედეგო მკურნალობამ საერთოდ ხომ არ დაუზიანა ღვიძლი?

 
პასუხი: 

1 გენოტიპით პაციენტების წარუმატებელი ანტივირუსული მკურნალობის შემთხვევაში განმეორებითი მკურნალობა ტარდება პეგილირებულ ინტერფერონსა და რიბავირინზე მესამე პრეპარატის - ბოცეპრევირის ან ტელაპრევირის დამატებით. განმეორებითი მკურნალობის შედეგები დამოკიდებულია პირველი, წარუმატებელი მკურნალობის შედეგზე და იგი შეიძლება 3 ტიპის იყოს: რელაფსი, როცა მკურნალობის დროს ვირუსი ქრება სისხლიდან, თუმცა მისი შეწყვეტის შემდეგ იგი კვლავ უბრუნდება პირვანდელ მაჩვენებლებს; ნაწილობრივ მოპასუხე – როცა ვირუსების რაოდენობა მკურნალობის შედეგად მნიშვნელოვნად მცირდება [100-ჯერ და მეტად], მაგრამ სრულად არ ქრება; და არამოპასუხე – როცა ვირუსების რაოდენობა მკურნალობის პროცესში საერთოდ არ იცვლება. განმეორებითი მკურნალობისას საუკეთესო შედეგები მიიღწევა რელაფსით და ნაწილობრივ მოპასუხე პაციენტებში. სამი პრეპარატით განმეორებითი მკურნალობა ნაკლებეფექტურია არამოპასუხეებში. 

კითხვა: 

ექიმთან არ ვყოფილვარ. ჩემი ინიციატივით ყოველი თვის ბოლოს ვიკეთებ გადასხმას: კერძოდ, რინგერს და გლუკოზას. ასევე, პერიოდულად ვიკეთებ ბ1 და ბ6 ვიტამინს. თუ შეიძლება მიპასუხეთ, გარკვეულწილად აჩერებს თუ არა ასეთი მკურნალობა C ვირუსის განვითარებას და ხომ არ ახდენს ცუდ ზეგავლენას სხვა ორგანოებზე?

 
პასუხი: 

თქვენს მიერ დასახელებულ მედიკამენტებს: [რინგერისა და გლუკოზის ინტრავენური საინექციო ხსნარები და ბ ჯგუფის ვიტამინები] ვირუსის საწინააღმდეგო მოქმედება არა აქვთ და არც დაავადების განვითარებაზე ახდენენ რაიმე გავლენას.

კითხვა: 

გადავინერგე ღვიძლი, C ვირუსი დარჩა. რა დროის მერე გააღიზიანებს გადანერგილ ღვიძლს ვირუსი და შეიძლება მეორედ გადანერგვა ან მკურნალობა?

 
პასუხი: 

ღვიძლის ტრანსპლანტაციით პაციენტებს,როგორც წესი, უნვითარდებათ განმეორებითი C ჰეპატიტი. იმუნოსუპრესიული თერაპიის ფონზე [პროგრაფი], მათში დაავადება უფრო სწრაფი ტემპით პროგრესირებს და გადანერგვის ოპერაციიდან 5 წლის განმავლობაში ალოგრაფის [გადანერგილი ღვიძლის] ციროზი ვითარდება 20-30%-ში. დაავადების შემდგომი პროგრესირების პროფილაქტიკის ერთადერთი საშუალებაა კომბინირებული ანტივირუსული თერაპიის ჩატარება პეგილირებული ინტერფერონითა და რიბავირინით; ინტერფერონის  დოზირება იგივეა, რაც არატრანსპლანტირებულ შემთხვევეაში; მკურნალობის ხანგრძლივობა: სისხლში HCV-RNA უარყოფითი პასუხის მიღების შემდეგ კიდევ 6 თვე; მკურნალობის დაწყების დრო: ფიბროზი F2 მეტავირით; ანტივირუსული მკურნალობის მოსალოდნელი ეფექტურობა 30%-დეა; განმეორებითი გადანერგვის ჩვენებაა ალოგრაფის ციროზის განვითარება.

კითხვა: 

ღვიძლის დაზიანების რა ეტაპს ეძახიან ციროზს – F3, F4...?

 
პასუხი: 

F - ამ აღნიშვნით გამოხატავენ ღვიძლში შემაერთებელი ქსოვილის  - ფიბროზის განვითარების ხარისხს. F1 და F2 ქრონიკული ჰეპატიტის ადრეული სტადიებია, როცა ფიბროზი უმნიშვნელოდაა გამოხატული. F3 და F4 კი ქრონიკული ჰეპატიტის მოგვიანებითი, ციროზის წინა სტადიებია - აქ ფიბროზი მკვეთრადაა გამოხატული. ამის შემდეგაა ღვიძლის ციროზი, როცა მეოთხე ხარისხის ფიბროზის გარდა ღვიძლში ჩნდება რეგენერაციის კვანძები და  იწყება ღვიძლის ფუნქციური უკმარისობის გამოვლინება.

კითხვა: 

თითქმის 10 წელია რაც ვიცით, რომ მეუღლე C ჰეპატიტითაა ავად. მთელი ამ დროის განმავლობაში ის აქტიურად ეწევა და სვამს იმ მიზეზით, რომ მაინც არაფერი ეშველება. ჩემი მხრიდან არანაირმა ხერხმა არ გაჭრა, რომ მან ნორმალური ცხოვრებით იცხოვროს. ალბათ ძნელი მისახვედრი არ არის - რას განვიცდი, ყოველთვის შიშით ვაკვირდები… ამ ჯოჯოხეთს მტერსაც არ ვუსურვებ, მითუმეტეს, რომ ჯერ თვითონ მისახედი ორი შვილი მყავს. იქნებ თქვენ შეგიძლიათ მირჩიოთ რამე, ან საერთოდ, რა შემიძლია გავაკეთო?

 
პასუხი: 

ასეთ “ჯიუტ” პაციენტებზე დადებითად მოქმედებს-ხოლმე არა “ნოტაციების კითხვა” და შეშინება, არამედ ანალოგიური პრობლემის მქონე ახლობლის ან მეგობრის დადებითი მაგალითი და გამოცდილება. მოიძიეთ თქვენი მეუღლისათვის ავტორიტეტული პიროვნება ან ახლო მეგობარი, რომელიც ასევე ინფიცირებულია, მაგრამ თქვენი მეუღლისაგან განსხვავებით, გაიარა ექიმთან კონსულტაცია, ახლა სრულად ფლობს სიტუაციას, სისტემატურად დადის ექიმთან ვიზიტზე, ზუსტად იცის რა არის საჭირო იმისათვის, რათა შეინარჩუნოს და\ან გაიუმჯობესოს ჯანმრთელობა. მოახერხეთ მათი შეხვედრა და საუბარი. ამის შემდეგ, შეიძლება თქვენ მეუღლეს გაუჩნდეს ექიმთან ვიზიტის სურვილი.

კითხვა: 

ვიმკურნალე C ჰეპატიტი კომბინირებული თერაპიით და ვირუსი აღარ მაქვს. მკურნალობამდე მქონდა ფიბროზი ფ4 (18.8 კპს). შესაძლებელი არის თუ არა, რომ ღვიძლს ნორმალური მდგომარეობა დაბრუნდეს? სხვა ანალიზები ნორმაში მაქვს, მათ შორის - ღვიძლის ფუნქციები.

 
პასუხი: 

ქრონიკული C ჰეპატიტის გამო ღვიძლში ფიბროზის განვითარებით ირღვევა მისი ციტოარქიტექტონიკა. ამ პროცესის სრულად უკუგანვითარება და ღვიძლის პირვანდელი სტრუქტურის სრულად აღდგენა შესაძლებელი არაა. გამოხატული ფიბროზით პაციენტებში ეფექტური ანტივირუსული მკურნალობის შედეგად ფიბროზი დუნედ პროგრესირებს და ღვიძლიც ხანგრძლივი დროის განმავლობაში არ კარგავს ფუნქციებს.

კითხვა: 

გვაცნობეთ, როგორი მკურნალობაა ეფექტური C ვირუსის შედეგად ჩამოყალიბებული ციროზის დროს?

 
პასუხი: 

ღვიძლში ციროზის განვითარებისას დაზიანებული ღვიძლის უჯრედების ადგილას ჩანაცვლებულია სხვა ქსოვილი (შემაერთებელი ქსოვილი) – განვითარებულია ღვიძლის ფიბროზი. ამ ქსოვილს, ცხადია, ღვიძლის ფუნქციის შესრულება არ შეუძლია და პაციენტს  ღვიძლის ფუნქციური უკმარისობა უვლინდება. პრობლემას ისიც წარმოადგენს, რომ შემაერთებელი ქსოვილი თავადაც პროგრესირებს და ამასთან, შეუძლებელია რაიმე წამლების მიღებით მისი ღვიძლიდან “გაქრობა”.  ნებისმიერი სხვა დაავადებით, ასევე C ჰეპატიტით გამოწვეული ღვიძლის ციროზის სტადიაზე ტარდება სიცოცხლისათვის საშიში გართულებების წინააღმდეგ ბრძოლა. ესენია: ასციტი, პორტული ჰიპერტენზია, საყლაპავის ვენებიდან სისხლდენა, ღვიძლისმიერი ენცეფალოპათია.

კითხვა: 

რას ნიშნავს C ჰეპატიტის ფ4 (ფიბრომა) სტადია? რამდენად შეიძლება დაექვემდებაროს მკურნალობას?

 
პასუხი: 

F4- ქრონიკული ჰეპატიტის მოგვიანებითი, ციროზის წინა სტადიაა. ამ დროს ღვიძლში ფიბროზი მკვეთრადაა გამოხატული. F3, F4 – შორს წასული ღვიძლის ფიბროზის სტადიაზე ანტივირუსული მკურნალობა ნაკლებეფექტურია დაავადების ადრეულ [F1,F2] სტადიებთან შედარებით.

კითხვა: 

ჩემს მეუღლეს რამდენიმე წლის წინ აღმოაჩნდა C ჰეპატიტის ვირუსი, 1ბ გენოტიპი. საფრანგეთში გაიარა 48 კვირიანი კურსი ძალიან კარგი შედეგებით - გაუნულდა ვირუსი. რამდენიმე დღის წინ გაიკეთა ფიბროსკანი, რომლის შედეგადაც ღვიძლის ელასტიურობის მაჩვენებლი აქვს 26,6კპა. თუ შეგიძლიათ მითხრათ, რამდენად სერიოზულადაა ღვიძლი დაზიანებული და არის თუ არა ეს ღვიძლის ციროზი? რა უნდა გაკეთდეს მდგომარეობის გასაუმჯობესებლად?

 
პასუხი: 

ელასტოგრაფიის თქვენს მიერ დასახელებული მაჩვენებელი ნიშნავს იმას, რომ თქვენს მეუღლეს დაავადება ღვიძლის ციროზის სტადიაზე აქვს. ძალიან კარგია, რომ ანტივირუსული მკურნალობა აღმოჩნდა ეფექტური და ვირუსი აღარ მრავლდება. ეს, დიდი ალბათობით, ხანგრძლივი დროით შეუნარჩუნებს მას მოფუნქციონირე ღვიძლს. აუცილებელია, რომ ასეთმა პაციენტმა განაგრძოს  ჯანმრთელი ცხოვრების წესით ცხოვრება და ექიმის გადაწყვეტილებით ანალიზებისა და გამოკვლების ჩატარება 3-6 თვიანი ინტერვალით.

კითხვა: 

სხვა რაიმე ახალი წამლები არ არის, რომ ვიმკურნალო C ჰეპატიტი ციროზის სტადიაზე?

 
პასუხი: 

რაიმე ერთი  უნივერსალური პრეპარატით ღვიძლის ციროზის სტადიაზე დაავადების მკურნალობა არ ხდება. თითოეულ პაციენტში იმ გართულების მკურნალობა ტარდება, რაც ციროზის გამოა განვითარებული. 

კითხვა: 

ჩემს მეუღლეს აღმოაჩნდა C ჰეპატიტი, მაგრამ ჯერ ვერ მკურნალობს უსახსრობის გამო. ღვიძლის ფუნქციები თავიდან იყო: ალტ-58, ასტ-32; ახლა, 3 თვის შემდეგ აქვს: ალტ-40 და ასტ-24; ეს კარგის ნიშანია?მაინტერესებს, ნეტა ვირუსიც ხომ არ განადგურდება?!

 
პასუხი: 

ქრონიკული ჰეპატიტისაგან თვითგანკურნება შესაძლებელი არაა. თქვენს მიერ დასახელებული ლაბორატორული ანალიზები ასახავენ ღვიძლში მიმდინარე ანთებას და არა მისი დაზიანების სიმძიმეს, ან დაავადების სტადიას. C ჰეპატიტისათვის ტრანსამინაზების სწორედ ასეთი ცვლილებაა დამახასიათებელი, ანთების მაჩვენებლები ტალღისებურად იცვლება: მატულობს, კლებულობს, ისევ მატულობს და ასე შემდეგ. გირჩევთ, ჩაიტაროთ სრულყოფილი გამოკვლევა, და რაც მთავარია, გაიაროთ სპეციალისტის კონსულტაცია. 

კითხვა: 

სად შეიძლება ავიღოთ ანალიზი C ჰეპატიტზე და არის თუ არა გამოკვლევა უფასო? თუ არა, რა ღირს?

 
პასუხი: 

პირველადი სეროლოგიური კვლევა (რითაც მხოლოდ C ვირუსით ინფიცირების ფაქტის დადგენაა შესაძლებელი) არაა ძვირადღირებული, ტესტ-სისტემის ხარისხზე დამოკიდებულებით  მისი ფასი 10-დან 20 ლარამდეა და მისი ჩატარება შესაძლებელია პრაქტიკულად ყველა, როგორც სახელმწიფო, ასევე კერძო დიაგნოსტიკურ ცენტრში.
C ვირუსის საწინააღმდეგო ანტისხეულებზე პირველადი გამოკვლევის ჩატარება შესაძლებელია ქვეყნის ყველა დიდ ქალაქსა და რაიონულ ცენტრში, რადგანაც მთელი ქვეყნის მასშტაბით 50-ზე მეტი სეროლოგიური ლაბორატორია ფუნქციონირებს.
დადებითი პირველადი  რეაქცია აუცილებლად საჭიროებს  კვლევის მაღალმგრძნობიარე მეთოდით დადასტურებას- კონფორმაციას.
მისი ჩატარება  შესაძლებელია რამდენიმე სპეციალიზებულ ლაბორატორიაში, მათ შორის ინფექციური პათოლოგიის ცენტრის, შიდსის, “ციტოს”, “ინტერკლინიკის”, “ლიმბახის” და ა.შ. ლაბორატორული გამოკვლევების ჩატარება შესაძლებელია ბათუმისა და ქუთაისის კლინიკებშიც.
რაც შეეხება  ვირუსის რაოდენობის განსაზღვრას სისხლში და მისი ტიპის დადგენას, ეს რთული მოლეკულურ-გენეტიკური კვლევებით ხდება და შესაბამისად, მათი ღირებულებაც გაცილებით მაღალია (რამდენიმე ასეული ლარი). 

კითხვა: 

რა არის ის სიმპტომები, რომლის აღმოჩენის შემდეგ ეჭვი უნდა მივიტანოთ C ჰეპატიტზე?

 
პასუხი: 

ნუ დაელოდებით დაავადების სიმპტომების განვითარებას, თუ თვლით, რომ ვირუსით ინფიცირების მაღალი რისკის ქვეშა ხართ

[ჩატარებული გაქვთ დონორის სისხლის გადასხმა ან მრავლობითი სამედიცინო მანიპულაციები, იყავით ნარკოტიკების მომხმარებელი, ოჯახში გყავთ C ჰეპატიტით დაავადებული წევრი, სილამაზის სალონებს ხშირად სტუმრობდით, ან საერთოდ, რაიმე ეჭვი გაქვთ და სხვ.], დაუყოვნებლივ ჩაიტარეთ ტესტირება. C ჰეპატიტის დროს დაავადების კლინიკური გამოვლინება ხშირად მხოლოდ შორსწასულ სტადიაზე ვითარდება.

 

კითხვა: 

მეშინია. როგორ მოვერიო ამ შიშებს?

 

 
პასუხი: 

შიშის დაძლევაში დაგეხმარებათ თქვენი მკურნალი ექიმი, რომელიც დეტალურად გაანალიზებს თქვენს ისტორიას, განგისაზღვრავთ თქვენი დაავადების პროგრესირების რისკ-ფაქტორებს და გასწავლით, როგორ  მოახერხოთ ღრმა მოხუცებულობამდე მოფუნქციონირე ღვიძლის შენარჩუნება.

კითხვა: 

რა აზრის ხართ “ბაობაბზე”?

 
პასუხი: 

ბაობაბი არაა სამკურნალწამლო საშუალება - კვებითი დანამატია. ამდენად, მასზე არაა ჩატარებული კლინიკური კვლევები, არც მისი კლინიკური ეფექტურობის შესახებაა რაიმე  ცნობილი. ახლა - “ბაობაბი”, ცოტა ადრე - “კამელინი” და “გა 40”, უფრო ადრე - “მამქოლი” და "გაგნოლი”. ამ “ყოვლისშემძლე” და “სასწაულმომქმედი” აბების მიღების წინააღმდეგი იმიტომ კი არა ვარ, რომ მათ მიღებას რაიმე დიდი ვნების მოტანა შეუძლიათ, საქმე ისაა, რომ, სასწაულის მოხდენის მოლოდინში იკარგება ყველაზე მნიშვნელოვანი - დრო, რისი ანაზღაურებაც მერე არც ერთი, მათ შორის  ძლიერმომქმედი მედიკამენტითაც აღარაა შესაძლებელი.

კითხვა: 

სად ხდება ღვიძლის გადანერგვა და რა თანხა ჯდება ეს?

 
პასუხი: 

ღვიძლის გადანერგვის ოპერაცია ტარდება ძალიან ბევრ ქვეყანაში, მათ შორის ჩვენი ახლო მეზობელი ქვეყნებიდან [რომლებშიც ვიზის გარეშეა შესაძლებელი გამგზავრება] - აზერბაიჯანში, თურქეთში,  ბელორუსიაში. ფასები ბევრ ფაქტორზეა დამოკიდებული. მხოლოდ ოპერაციის ღირებულება 60 000 - 120 000 დოლარია.

კითხვა: 

არსებობს მედიკამენტი, რომელიც ვირუსის გამრავლებას შეუშლის ხელს?

 
პასუხი: 

პაციენტების 50-70%-ში C ვირუსის გამრავლება წყდება მხოლოდ პეგილირებული ინტერფერონებისა და რიბავირინის 6-12 თვიანი მკურნალობის კურსის ჩატარების შემდეგ. სხვა არც ერთი მედიკამენტის  ეფექტურობა დადგენილი არაა.

კითხვა: 

C ჰეპატიტმა თუ იცის წონაში სწრაფი კლება ან მომატება, ან რაიმე ისეთი სიმპტომები თუ აქვს (მაგ. კუჭ-ნაწლავის პრობლემები, სიმძიმის შეგრძნება მარჯვენა მხარეს...), რის მიხედვითაც მივხვდები, რომ C ჰეპატიტით ვარ დაინფიცირებული.

 
პასუხი: 

C ჰეპატიტს, რათქმაუნდა, გააჩნია თავისი სიმპტომები, მაგრამ ისინი შეიძლება ახლდეს ბევრ სხვა დაავადებასაც. ამიტომ, თქვენ თვითონ, სიმპტომების მიხედვით, ექიმისა და ანალიზის გარეშე ვერ მიხვდებით - C ჰეპატიტით დაავადებული ხართ თუ არა.თუკი ოდნავ მაინც გაქვთ ეჭვი, გაიკეთეთ ანალიზი C ჰეპატიტის არსებობაზე (მისი ფასი სხვადასხვა კლინიკაში ათიდან ოც ლარამდე მერყეობს).

 

კითხვა: 

თუკი შემთხვევით ვიჩხვლიტე C ჰეპატიტის ვირუსით დაბინძურებული ნემსი, რა შემიძლია მაშინვე გავაკეთო, რით დავიცვა თავი ვირუსის ორგანიზმში შემდგომი გავრცელებისაგან?  და კიდევ, C ჰეპატიტის ვირუსის ორგანიზმში მოხვედრიდან რამდენ ხანში შეიძლება ანალიზის აღება, რა დროში აჩვენებს ანალიზი მის არსებობას ან არარსებობას?  

 
პასუხი: 

ინფიცირებული სისხლით დაბინძურებული ნემსის ერთჯერადად შემთხვევით ჩხვლეტის შემთხვევაში დაავადების განვითარების ალბათობა დაბალია და არ აღემატება 5%-ს [ვითარდება ასიდან მხოლოდ 5 შემთხვევაში],  მაშინ, როცა მაგ. B ჰეპატიტის ვირუსით ინფიცირებულის სისხლით დაბინძურებული ნემსის ერთჯერადი ჩხვლეტის შემთხვევაში  ინფიცირების ალბათობა  გაცილებით დიდია -50%. რადგანაც არ არსებობს C ჰეპატიტის ვაქცინა, რაიმე ღონისძიებით ორგანიზმში დაავადების განვითარების შეჩერება არაა შესაძლებელი. საეჭვო ინფიცირებულმა 1 თვიანი ინტერვალით უნდა ჩაიტაროს ლაბორატორული კვლევა C ჰეპატიტზე.  ვირუსის გენეტიკური ანალიზით  [PCR რეაქცია] მისი სისხლში აღმოჩენა შესაძლებელია ინფიცირებიდან უკვე 2-6  კვირის შემდეგ. ვირუსის საწინააღმდეგო ანტისხეულებზე  რეაქცია დადებითი ხდება ინფიცირებიდან 2-4 თვის შემდეგ.ინფიცირების მწვავე ფაზის დადგენა შესაძლებლობას მოგცემთ ანტივირუსული მკურნალობის ჩატარების შემთხვევაში 100%-ით განიკურნოთ  მწვავე დაავადებისაგან.  

 

კითხვა: 

4 წლის წინ წარმატებით ჩავიტარე ინტერფერონოთერაპია და ვირუსი გაქრა. მაინტერესებს, არსებობს თუ არა კიდევ იმის შესაძლებლობა, რომ ამ დაავადებამ კვლავ იჩინოს თავი და როგორ უნდა მოვუფრთხილდე თავს? რამდენად შესაძლებელია არადიეტური კვება და ალკოჰოლის მიღება?

 
პასუხი: 

წარმატებული ანტივირუსული თერაპია არ ნიშნავს, რომ თქვენ იმუნიტეტი შეიძინეთ C ვირუსული ინფექციის მიმართ. თუ თქვენს ორგანიზმში კვლავ მოხვდება C ვირუსი, დაავადების თავიდან განვითარებისაგან დაცული არა ხართ. ამასთან, C ვირუსი არაა ღვიძლის დამაზიანებელი ერთადერთი ფაქტორი. არსებობს ასეთი დაავადება – ალკოჰოლური ჰეპატიტი, რომელიც ასევე ღვიძლის ციროზს იწვევს და უფრო სწრაფადაც, ვიდრე C ვირუსი. ღვიძლს ადამიანი ყოველთვის უნდა გაუფრთხილდეს, მათ შორის ინტერფერონოთერაპიის შემდეგაც.

 

კითხვა: 

2014 წლიდან შესაძლებელი იქნება თუ არა სახელმწიფო პროგრამით C ჰეპატიტზე მკურნალობა? და თუ იქნება შესაძლებელი, ვის უმკურნალებენ პირველ რიგში?

 
პასუხი: 

ჩემი აზრით, სახელმწიფო აუცილებლად შეიმუშავებს C ჰეპატიტისაგან მიყენებული ვნების, ზიანის შესამცირებელი ღონისძიებების პროექტს. როგორც ვიცი, დაგეგმილია იაფი ანტივირუსული პრეპარატების შემოტანა და/ან  ჩვენთან წარმოება. სავარაუდოდ, იქნება მკურნალობის ხელშეწყობაც.
თუმცა, არა მგონია შესაძლებელი გახდეს ყველა ინფიცირებულის უფასო მკურნალობა. ეს მაინც ასტრონომიული ხარჯებია ჩვენთან  მოსახლეობის ინფიცირების ძალზე მაღალი მაჩვენებლიდან გამომდინარე.

კითხვა: 

C ჰეპატიტის ფონზე საკვების მიღების შემდეგ ტკივილი მუცლის არეში, შებერილობა, გულისრევის შეგრძნება, საერთო სისუსტე, ფეხების ტკივილი, მომატებული (37) ტემპერატურა... ეს დაავადების რომელ სტადიაზე მიგვითითებს? აღსანიშნავია, რომ C ჰეპატიტს თან ერთვის პიელონეფრიტი, რომელიც ადრეც ჰქონდა გადატანილი. ავადმყოფი ღრმა დეპრესიაშია და ვერ ვახერხებთ მის მკურნალობაზე დაყოლიებას. მიზეზად უსახსრობას და მკურნალობის სავარაუდო უშედეგობას ასახელებს... რას გვირჩევდით?

 
პასუხი: 

შემთხვევა სცილდება ინტერნეტით რეკომენდაციების მიცემის შესაძლებლობის ფარგლებს. აუცილებელია სპეციალისტის კონსულტაცია.

კითხვა: 

რამდენად არის პერპექტივაში მკურნალობის ფასის დაწევა?ან თუ მიმდინარეობს მსოფლიო მასშტაბით ისეთი პრეპარატის კვლევა, რომელიც ადვილად განკურნავს C ჰეპატიტს?

 
პასუხი: 

ამ პერიოდისათვის კომბინირებული ანტივირუსული მკურნალობის ფასი, მათ შორის ჩვენს ქვეყანაშიც, წინა წლებთან შედარებით მნიშვნელოვნადაა შემცირებული. ეს იმასთანაა დაკავშირებული, რომ ამჟამად ლიცენზირებულ პეგილირებულ ინტერფერონებს – ამერიკულ პეგინტრონსა და შვეიცარულ პეგასისს ლიცენზიის ვადა  ეწურებათ 2015 წლისათვის. გამოცდას გადის ათეულობით  ახალი პრეპარატი და რამდენიმე სქემა, რომლებიც საერთაშორისო რეკომენდაციებში სავარაუდოდ 2014 ან 2015 წელს შევა. ახალი პრეპარატები აბებია, მკურნალობის ხანგრძლივობა - არა უმეტეს 3-6 თვე. რაც შეეხება ფასებს, მკურნალობის ახალი სქემები გაცილებით ძვირადღირებულია, ვიდრე ინტერფერონები. იქნება უფრო იაფფასიანი პრეპარატებიც - ინტერფერონების ე.წ. ჯენერიკები, რომლებიც პეგილირებული ინტერფერონების ლიცენზიით სხვა ქვეყნებში იქნება დამზადებული.   

კითხვა: 

 

რამდენად შესაძლებელია, რომ ვირუსმა 2-3 თვეში დაიწყოს ღვიძლის დაზიანება?

 
პასუხი: 

C ვირუსის მოქმედებით ღვიძლი მუდმივად ზიანდება. თუმცა, გარკვეულ პერიოდამდე ეს ორგანო ახერხებს ისე მუშაობას, რომ ლაბორატორული კვლევით ღვიძლის ძირითადი  ფუნქციები არაა დარღვეული.  მოგვიანებით ირღვევა ფუნქციები და ეს შეიძლება მოხდეს რამდენიმე თვეში.

კითხვა: 

მამას აღმოაჩნდა C ჰეპატიტი. გავიგე, რომ მისი საპარსი ჩემს ძმასაც გამოუყენებია. ძალიან ვნერვიულობ, არ ვიცი, როგორ მოვიქცე.

 
პასუხი: 

თუკი ოდნავ მაინც გაქვთ ეჭვი, აუცილებელია ჩაიტაროთ ლაბორატორული კვლევა სისხლში ვირუსის საწინააღმდეგო ანტისხეულების აღმოსაჩენად.  ეს მარტივი  პირველადი სეროლოგიური კვლევაა და მისი ჩატარება შესაძლებელია პრაქტიკულად ყველა, როგორც სახელმწიფო, ასევე კერძო დიაგნოსტიკურ ცენტრში. დადებითი პირველადი  რეაქცია აუცილებლად საჭიროებს  კვლევის მაღალმგრძნობიარე მეთოდით დადასტურებას - კონფორმაციას.მისი ჩატარება  შესაძლებელია რამდენიმე სპეციალიზებულ ლაბორატორიაში, მათ შორის ინფექციური პათოლოგიის ცენტრის, შიდსის, “ციტოს”, “ინტერკლინიკის”, “ლიმბახის” და ა.შ.
სრულიად დასაშვებია - ანალიზის შედეგმა აჩვენოს, რომ სულ ტყუილად ნერვიულობდით.

კითხვა: 

ჩემს შეყვარებულს აქვს C ჰეპატიტი. თუ არის იმის შანსი, რომ ნერწყვით გადავიდეს ეს დაავადება? თუ მაგალითად, პირის ღრუში ჰქონდა ჭრილობა და ჩემს პირში მოხვდა მისი სისხლი.

 
პასუხი: 

C ჰეპატიტის ვირუსი ნერწვით არ გადადის, მაგრამ გასათვალისწინებელია, რომ ამ ვირუსით ინფიცირება უმთავრესად სისხლის სისხლთან უშუალო შეხებით ხდება, რაც გულისხმობს იმას, რომ C ჰეპატიტით ინფიცირებულის სისხლი უნდა მოხვდეს სხვა ადამიანის სისხლში გაჭრილი კანის ან ღია ჭრილობის მეშვეობით. კონკრეტულ შემთხვევაში, თუკი ორივე პარტნიორს ტუჩზე ან პირის ღრუში ჭრილობა ან ნაკაწრი აქვს, ვირუსით ინფიცირება შესაძლებელია.

კითხვა: 

შეიძლება თუ არა ნალექიანი ან უნალექო ყავის დალევა?

 
პასუხი: 

ყავა შეიცავს კოფეინს, რომელიც ღვიძლში მეტაბოლიზდება - იშლება. ღვიძლის ფუნქციის დაზიანების დროს ეს პროცესი დარღვეულია, ჭარბი კოფეინი ორგანიზმში გროვდება და აუარესებს პაციენტის მდგომარეობას. ამის გამოა, რომ ღვიძლის ციროზით პაციენტებს არ ურჩევენ  კოფეინის შემცველი სასმელების მიღებას. თუ თქვენ შენარჩუნებული გაქვთ ღვიძლის ფუნქციები, ზომიერად [დღეში ერთი ჭიქა] ყავის მიღება არ გეკრძალებათ. 

კითხვა: 

მკურნალობის დაწყება მინდა და როგორ მოვემზადო?

 
პასუხი: 

რადგანაც გადაწყვიტეთ ანტივირუსული მკურნალობის ჩატარება, ესე იგი ფსიქოლოგიურად უკვე მომზადებული ხართ. ახლა უცილებელია შეარჩიოთ ინფექციონისტი-ჰეპატოლოგი, რომელიც:

- დეტალურად გაანალიზებს თქვენი ავადმყოფობის ისტორიას, განსაზღვრავს თქვენს შემთხვევაში ანტივირუსული ქიმიოთერაპიის გვერდითი ეფექტების რისკ-ფაქტორებს;

- გვერდითი ეფექტების წარმატებით მართვისათვის შეიმუშავებს თქვენი მკურნალობის ინდივიდუალურ სქემას, საჭიროების შემთხვევაში მართვაში დაიხმარებს სხვა დარგის სპეციალისტებს;

- დეტალურად გაგაცნობთ მკურნალობის გვერდითი ეფექტებს, გასწავლით  მათ მართვას;  

- მკურნალობის პროცესში მოახდენს თქვენს  მონიტორინგს. 

კითხვა: 

ხდება თუ არა C ჰეპატიტისაგან სრულად განკურნება?

 
პასუხი: 

დიახ. C ქრონიკული ინფექცია კომბინირებული ანტივირუსული მკურნალობით სრულად ინკურნება. 1 გენოტიპით პაციენტები - 50%-ში, ხოლო 2-3 გენოტიპით პაციენტები - 70-80%-ში იკურნებიან.  

კითხვა: 

მაქვს C ჰეპატიტი. თვითნებურად ვიმკურნალე "პეგასისით". ეს პრობლემაა?

 
პასუხი: 

ეს, რა თქმა უნდა, არაა პრობლემა, თუ თქვენ იცოდით: ანტივირუსული მკურნალობის პროცესის მართვა, მკურნალობა აღმოჩნდა ეფექტური, მოახერხეთ განკურნება და თანაც გაგიმართლათ და მკურნალობას არც ერთი სერიოზული გვერდითი ეფექტი არ გამოუწვევია.

კითხვა: 

 

შესაძლებელია მეტადონის პროგრამის პარალელურად C ჰეპატიტზე მკურნალობის ჩატარება?

 
პასუხი: 

ჩატარებულია საერთაშორისო კვლევა C ჰეპატიტით იმ პაციენტების ანტივირუსული მკურნალობის ეფექტურობის დასადგენად, რომლებიც იმყოფებიან მეტადონის პროგრამაზე. ამ კვლევის მონაცემებით მეტადონის პროგრამაზე მყოფ პაციენტებში შესაძლებელია ჩატარდეს ანტივირუსული თერაპია. თუმცა, ამ პაციენტებში მკურნალობის შედეგები იყო უარესი, ამასთან, უფრო ხშირად ხდებოდა აუცილებელი მკურნალობის შეწყვეტა მძიმე ნევროლოგიური გართულებების განვითარების გამო.

კითხვა: 

მაინტერესებს, რა შედეგს იძლევა პრეპარატი"ლივოლაითი" და რამდენად ეფექტურია ამ პრეპარატით მკურნალობა?

 
პასუხი: 

 

ასეთი დასახელების სამკურნალო პრეპარტი არაა საქართველოს ფარმაცევტულ ქსელში [ცნობარი ვიდალი –სამკურნალო პრეპარატები საქართველოში 1013/1014 გამომცემლობა “ფარმინფორმი”]

კითხვა: 

მეუღლეს ჰქონდა C ჰეპატიტი და იმკურნალა ინტერფერონით. მკურნალობის დასრულებიდან რამდენი ხანი არ შეიძლება დაფეხმძიმება, რამდენი ხანი სჭირდება ორგანიზმს, რომ გაიწმინდოს წამლისგან. რამდენად სარისკოა ორსულობა?  

 
პასუხი: 

კომბინირებული ანტივირუსული მკურნალობის დასრულებიდან  6 თვის შემდეგ ორგანიზმი სრულადაა განთავისუფლებული პრეპარატებისაგან. თუმცა, რეკომენდაციებით, დაორსულება ნებადართულია მკურნალობის დასრულებიდან მხოლოდ 1 წლის შემდეგ. წარსულში ინტერფერონოთერაპიას ორსულობაზე ან ნაყოფის განვითარებაზე უარყოფითი გავლენა არა აქვს.

 

 

კითხვა: 

მაინტერესებს, C ჰეპატიტი იწვევს თუ არა მამაკაცის პოტენციის დაქვეითებას და ეყოლება თუ არა მას შვილი? თუ შესაძლებელია, რამდენად უსაფრთხოა ეს ბავშვის ჯანმრთელობისათვის და რამდენად დიდია ბავშვის დაინფიცირების რისკი?

 
პასუხი: 

C ვირუსით ინფიცირებულთა მხოლოდ მცირე ნაწილს ქრონიკული ანთების სტადიაზე და მნიშვნელოვან ნაწილს ღვიძლის ციროზის სტადიაზე აღენიშნება პოტენციის დაქვეითება. რაც შეეხება ინფიცირებული მამაკაცისაგან ნაყოფის  ჩასახვას, C ჰეპატიტი არაა გენეტიკური დაავადება და შესაბამისად, დაავადება მამისაგან შვილს არ გადაეცემა. ბავშვის მამისაგან დაინფიცირება მხოლოდ ასეთი სქემითაა შესაძლებელი: მამაკაცისაგან დაინფიცირდა მისი სექსუალური პარტნიორი [ალბათობა მინიმალურია, არ აღემატება 5%-ს], ინფიცირებული დედიდან მუცლად ყოფნის პერიოდში დაინფიცირდა ნაყოფი [ამის ალბათობაც მინიმალურია და 3-5%-ს არ აღემატება].

C ჰეპატიტი არ მიეკუთვნება არც სექსუალური გზით და არც ვერტიკალურად – დედიდან ნაყოფზე გადამდებ ინფექციებს. ინფიცირებული მამაკაცების დიდი უმრავლესობის მეუღლეები არ არიან ინფიცირებულები და ჰყავთ სრულიად ჯანმრთელი შვილები.   

კითხვა: 

თუ დედა დაავადებულია  C ჰეპატიტით, როგორია ალბათობა იმისა, რომ გენეტიკურად გადავიდეს დედისგან შვილზე ეს დაავადება. რა ასაკში ამოწმებენ ასეთ ბავშვებს C ვირუსის არსებობაზე?  როდიდან, როგორ და სად შეიძლება მისი მკურნალობა. არსებობს თუ არა რაიმე შეღავათები მცირეწლოვანთა მკურნალობისათვის?

 
პასუხი: 

C ვირუსით ინფიცირებული  ორსული ქალების 95-97%-ში ბავშვი არ ინფიცირდება. მუცლადყოფნის პერიოდში ნაყოფის ინფიცირების ალბათობა მაღალია იმ ქალებში, რომლებსაც სისხლში ვირუსების ძალიან მაღალი შემცველობა აღენიშნებათ, აგრეთვე აივ-შიდსით ინფიცირებულებში. ინფიცირებული დედის ახალშობილს სისხლში  უკვე აქვს C ვირუსის საწინააღმდეგო ანტისხეულები (რომელიც დედისაგან მიიღო მუცლადყოფნის პერიოდში). დედის ანტისხეულები  ბავშვში  საშუალოდ 18 თვის ასაკამდე ცირკულირებენ. იმის დადგენა, კონკრეტულად დაინფიცირდა თუ არა დედისაგან ბავშვი,  18 თვის ასაკამდე შესაძლებელია მხოლოდ  ბავშვის სისხლში C ვირუსის გენეტიკური მასალის აღმოჩენით [PCR რეაქცია]. 18 თვეზე მეტი ასაკის ბავშვის სისხლში  C ვირუსის საწინააღმდეგო ანტისხეულების არსებობა[ანტი HCV]  უკვე დიდი ალბათობით მისი  მუცლადყოფნის პერიოდში დაინფიცირების მაჩვენებელია.

საერთოდ, მცირე ასაკის ბავშვებში  C ჰეპატიტი არ ხასიათდება აგრესიული მიმდინარეობით. რეკომენდაციებით, აუცილებელი საჭიროების შემთხვევაში ბავშვებში [რა თქმა უნდა შესატყვისი დოზებით] მოზრდილების ანალოგიურად, მოწოდებულია კომბინირებული ანტივირუსული თერაპიის ჩატარება. ბავშვებში ანტივირუსული მკურნალობის  შედეგები საკმაოდ კარგია. რაიმე შეღავათი პრეპარატების ფასებში ინფიცირებული ბავშვებისათვის დაწესებული არაა.

 

 

კითხვა: 

 როგორ უნდა მოვახდინო რაიმე ნივთის (დანის, მაკრატლის ან სხვა) დეზინფიცირება, თუ მასზე მოხვდა C ჰეპატიტით დაავადებულის სისხლი. ასევე, როგორ უნდა მოხდეს ხელების დეზინფიცირება თუ მაგალითად, ხელი დაგვესვარა ინფიცირებულის სისხლით. 

 
პასუხი: 

სამედიცინო დაწესებულებებში ყველა პაციენტი განიხილება, როგორც სისხლკონტაქტური ინფექციებით პოტენციური ინფიცირებული, ამიტომ არსებობს სამედიცინო ინსტრუმენტების დამუშავების სპეციალური წესები, რომელთა დაცვაზე დაწესებულია კონტროლი. რაც შეეხება ინფიცირებულის ოჯახის წევრების უსაფრთხოებას, აქ საკმარისია პირადი ჰიგიენის ელემენტარული ნორმების  დაცვა [დაუშვებელია სხვისი ჰიგიენის  ნივთების ხმარება: კბილის ჯაგრისი, საპარსი, ფრჩხილის მაკრატელი და სხვ.] იმ ოჯახებში, სადაც ასეთი ნორმების დაცვა ჩვეულებრივია, დაავადება, როგორც წესი, ოჯახის სხვა წევრებზე არ ვრცელდება. დაუზიანებელი კანიდან ვირუსი არ ვრცელდება, დაზიანებულ კანზე ინფიცირებულის სისხლის მოხვედრის შემთხვევაში საკმარისია საპნიანი წყლით დაბანა.   

 

კითხვა: 

  გადადის თუ არა C ჰეპატიტის ვირუსი კოღოს ნაკბენით (თუ ერთი და იგივე კოღო უკბენს ჯერ დაავადებულ და შემდეგ ჯანმრთელ ადამიანს)?

 
პასუხი: 

  მართალია, C ჰეპატიტის განვითარებისათვის საკმარისია ადამიანის ორგანიზმში ინფიცირებული სისხლის უმცირესი რაოდენობის [გრამის მეათასედი-მეათიათასედის] მოხვედრა და ეს თეორიულად შესაძლებელია კოღოს კბენის შედეგადაც, თუმცა იმ ქვეყნებში ჩატარებული კვლევებით, სადაც მოსახლეობის გაცილებით მეტი რაოდენობაა ინფიცირებული  C ვირუსით ვიდრე ჩვენთან და გაცილებით მეტი  კოღოა და სხვა სახეობის მწერიც [აფრიკის ქვეყნები], დადასტურებულია , რომ  არც  კოღოს, არც სხვა მწერის კბენით  ეს დაავადება პრაქტიკულად არ ვრცელდება.

კითხვა: 

რამდენად გადამდებია სქესობრივი გზით C ჰეპატიტი?

 
პასუხი: 

რამდენადაც ცნობილია, C ჰეპატიტი სქესობრივი გზით გადამ­დები დაავადება არ არის. ეს დაავადება არ გადადის ორგანიზმის შემადგენელი სხვა სითხით, გარდა სისხლისა.  მაგრამ სისხლი, თუნდაც მცირე რაოდენობით, შესაძლოა გამო­იყოს, მაგალითად, უხეში სექსის დროს ან ქალის მენსტრუალური ციკლის პერიოდში. ასე რომ, თუ თქვენ გაწუხებთ ამ დაავადებით დასნებოვნების საფრთხე, საუკეთესო რჩევაა - ­ გამოიყენეთ კონდომი. 

კითხვა: 

 როგორ შეიძლება გადაედოს  ადამიანს C ჰეპატიტი?

 
პასუხი: 

C ჰეპატიტის ვირუსით ინფიცირება უმთავრესად სისხლის სისხლთან უშუალო შეხებით ხდება, რაც გულისხმობს იმას, რომ Cჰეპატიტით ინფიცირებულის სისხლი უნდა მოხვდეს სხვა ადამიანის სისხლში გაჭრილი კანის ან ღია ჭრილობის მეშვეობით. 
ინფიცირებული ადამიანები ხშირად სწუხან იმაზე, რომ არ დაასნებოვნონ  ოჯახის სხვა წევრები. მიუხედავად იმისა, რომ C ვირუსი ძნელად ვრცელდება (თუ არ მოხდა სისხლის სისხლთან უშუალო შეხება), ვირუსის გადადება შესაძლებელია ისეთი საგნებითაც,  როგორიცაა: სამართებელი, კბილის ჯაგრისი, ფრჩხილის მაკრატელი და  პირადი ჰიგიენის სხვა ნივთები. თუმცა, ზემოთ ჩამოთვლილი საგნებით ვირუსის გადადება ძალზე იშვიათია. მაგალითად: კბილის ჯაგრისით ვირუსის გავრცელება ხდება  იმ შემთხვევაში, თუ ინფიცირებული ადამიანის მიერ მოხმარებულ ჯაგრისზე დარჩა სისხლი და იგი გამოიყენა ადამიანმა,  რომელსაც პირის ღრუში აქვს ღია ჭრილობა.  
 გასათვალისწინებელია:
•    ყველაფერი, რამაც გამოიწვია თქვენი კანის მთლიანობის დარღვევა;
 •    ყველაფერი, რაზეც მოხვდა თქვენი სისხლის წვეთი ან გაიჟღინთა თქვენი სისხლით;
 •    ყველაფერი, რაც კანის მეშვეობით იქნა თქვენს სხეულში შეყვანილი. 
თუ თქვენ  C ვირუსით ხართ ინფიცირებული, უნდა იცოდეთ, რომ თქვენი უმნიშვნელო სისხლის წვეთითაც კი არის შესაძლებელი სხვა ადამიანის დაინფიცირება. ასე რომ, უმჯობესია მიიღოთ  სიფრთხილის განსაკუთრებული ზომები.
 მიუხედავად იმისა, რომ სიფრთხილის ზომების დაცვა მკაცრად სავალდებულოა, აუცილებელია ზომიერების დაცვაც. არც ისაა კარგი, თუ სხვა ადამიანების დაინფიცირების შიში პარანოიაში გადაგეზრდებათ.
თქვენ  უნდა გააფრთხილოთ რისკის ქვეშ მყოფი ადამიანები, რათა მათ მიიღონ ზომები და თავიდან აიცილონ თქვენგან დაინფიცირება მაგალითად:
 •    ფლებოტომისტები (მედიცინის მუშაკები, რომლებიც იღებენს სისხლს), ისინი შესაძლოა დაინფიცირდნენ თქვენზე ნახმარი ნემსის შემთხვევით ჩხვლეტის შემდეგად;
 •    ტატუს სპეციალისტები;
 •    სხეულის/ყურის პირსინგის სპეციალისტები;
 •    აკუპუნქტურისტები, რომელთა მეშვეობითაც  ვირუსის გავრცელება შესაძლებელია იმ შემთხვევაში, თუ ისინი არ იღებენ  სიფრთხილის შესაბამის ზომებს;
 •    სტომატოლოგები.
მიუხედავად იმისა, რომ რისკი ძალზე დაბალია, მაინც მნიშვნელოვანია სიფრთხილით მოეკიდოთ სხვა ადამიანების დაცვასთან დაკავშირებულ საკითხებს. შეინახეთ კბილის ჯაგრისები, სამართებლის პირები, მაშები და ყველა  ნივთი, რომელზეც შესაძლოა იყოს თქვენი სისხლის უმნიშვნელო, თვალით შეუმჩნეველი რაოდენობა.  შეინახეთ პირადი ჰიგიენის ნივთები სხვა ადამიანის ჰიგიენური საშუალებებისგან მოშორებით.

კითხვა: 

დავიწყე მკურნალობა. მაქვს ფსორიაზი. რამდენადაც ვიცი, მკურნალობა იწვევს კანის სიმშრალეს. რა რჩევებს მომცემდით იმისათვის, რომ არ გამირთულდეს ფსორიაზთან დაკავშირებული გვერდითი მოვლენები?

 
პასუხი: 

ფსორიაზით პაციენტისათვის ინტერფერონითა და რიბავირინით კომბინირებული ანტივირუსული მკურნალობა უკუნაჩვენები არაა. მკურნალობის პროცესში კანის სიმშრალის თავიდან ასაცილებლად რეკომენდებულია სითხის დიდი რაოდენობით [3-4 ლ. დღეში] მიღება და დამატენიანებელი კრემები [მაგ. შხაპის შემდეგ ტოპიკრემის გამოყენება]. მკურნალობის პროცესში შესაძლებელია ფსორიაზის გამწვავებაც. ასეთ შემთხვევაში,  კონკრეტული,  დამატებითი თერაპიის საკითხი შეათანხმეთ თქვენს მკურნალ ექიმებთან - ჰეპატოლოგთან და დერმატოლოგთან.

 

კითხვა: 

ძალიან რთულად გადავიტანე ინტერფერონით მკურნალობის კურსი, თანაც მკურნალობა უშედეგო აღმოჩნდა. კიდევ ერთხელ ამას ვერ გადავიტან. გავიგე, რომ არსებობს რაღაც ახალი წამალი, რომელიც ინტერფერონისგან განსხვავდება და ამ წამლით მკურნალობა გაცილებით ადვილი ასატანია. თუ გსმენიათ ამის შესახებ, შეესაბამება თუ არა სიმართლეს? თუ შეიძლება, მეტი გვითხარით ამის შესახებ.

 
პასუხი: 

 ამჟამად ორ ათეულამდე  C ჰეპატიტის სამკურნალო მაღალეფექტური ახალი ანტივირუსული პრეპარატი გადის კლინიკურ კვლევებს.  სამეცნიერო კვლევების შედეგები ქვეყნდება სპეციალურ სამეცნიერო ჟურნალებში და საჯარო ხდება სამეცნიერო წრეებისთვის საერთაშორისო კონგრესებზე. ამიტომ, დარგის წამყვანი სპეციალისტებისათვის ყველა ინფორმაცია არა მარტო სრულად ხელმისაწვდომია, არამედ კარგადაა ცნობილი. უკვე 2014-2015 წლისათვის   ნაწილი კვლევებისა  დამთავრდება და მოხდება პრეპარატების დარეგისტრირება. ამის შემდეგ პრეპარატები ხელმისაწვდომი გახდება, მათ შორის ჩვენი  პაციენტებისათვისაც. უახლესი მომავლის ანტივირუსული სტრატეგია აღარ იქნება ინტერფერონზე დაფუძნებული, იქნება ორი ან სამი [მუშავდება რამდენიმე სქემა] პირდაპირი მოქმედების ანტივირუსული პრეპარატი. ყველა ახალი პრეპარატი აბების სახითაა, ამასთან მკურნალობის კურსი ყველა გენოტიპისათვის არ იქნება 3-6 თვეზე მეტი.

კითხვა: 

რას ნიშნავს დიაგნოზი: ქრონიკული C ჰეპატიტი პათოლოგიური აქტივობის გარეშე?

 
პასუხი: 

ქრონიკული C  ჰეპატიტი პათოლოგიური აქტივობის გარეშე ნიშნავს იმას, რომ თქვენს ორგანიზმში ვირუსის არსებობის მიუხედავად, 

 

ღვიძლის ფერმენტების აქტივობა მყარად, წლების მანძილზე ნორმალურ მაჩვენებლებზეა და არც ღვიძლის ფუნქციებია დარღვეული. 

 

დაავადების ასეთი მიმდინარეობა საკმაოდ ხშირია და ინფიცირებულთა 30-40%-ში გვხვდება. აგრესიული, აქტიური ფორმით ავადმყოფობის აგანგანსხვავებით, ასეთ პაციენტებში დაავადება შედარებით კეთილთვისებიანია, დუნედ პროგრესირებს.

 

ამ პაციენტთა დიდ უმრავლესობას ცხოვრების ჯანმრთელი წესის დაცვის პირობებში [ალკოჰოლისა და ტოქსიკური ნივთიერებების მიღების სრულად აკრძალვა, ზომიერი და სრულფასოვანიკვება, სტრესისგან თავის არიდება და ა.შ.]
ხანგრძლივად შეუძლიათ შეინარჩუნონ ნორმალურად მოფუნქციონირე ღვიძლი.

კითხვა: 

გავიგე, რომ მესამე, ახალი წამალი დაამატეს ინტერფერონს და რიბავერინს. მე 1ბ გენოტიპი მაქვს და ის სწორედ ამ გენოტიპისთვის ყოფილა ძალიან ეფექტური. საქართველოში შესაძლებელია ამ მკურნალობის ჩატარება? თუ შესაძლებელია, რა ღირს?

 
პასუხი: 

2012 წელს დარეგისტრირდა C ჰეპატიტის  სამკურნალო კიდევ ორი პირდაპირი ანტივირუსული მოქმედების პრეპარატი: ბოცეპრევირი და ტელაპრევირი. ორივეა ბებია, ინიშნება მხოლოდ 1 გინოტიპით პაციენტებში და მხოლოდ პეგილირებულ ინტერფერონებსა[პეგინტრონი ანპეგასისი] და რიბავირინზე დამატებით. 

 

პრეპარატები რეგისტრირებულია ჩვენქ ვეყანაშიც და ათეულზე მეტმა პაციენტმა უკვე დაამთავრა ან ახლა იტარებს ამ სამი პრეპარატით მკურნალობას. პრეპარატები მიღებულია თანამედროვე მაღალტექნოლოგიური მეთოდებით, ამიტომ ძვირადღირებულია.
 

მესამე პრეპარატის დამატებით მკურნალობის ფასი კიდევ რამდენიმე ათეული ათასი ლარით გაიზარდა.M მაგალითად,Eერთ წლიანი მკურნალობა პეგინტრონის, რებეტოლისა და ბოცეპრევირის კომბინაციით ღირს 50 000 ლარზემეტი.

კითხვა: 

თბილისის გარდა, საქართველოში სად აკეთებენ C ჰეპატიტის ვირუსის არსებობაზე ანალიზს?

 
პასუხი: 

C ვირუსის საწინააღმდეგო ანტისხეულებზე პირველადი გამოკვლევის ჩატარება შესაძლებელია ქვეყნის ყველა დიდ ქალაქსა და რაიონულ ცენტრში.მთელი ქვეყნის მაშტაბით 50-ზე მეტი სეროლოგიური ლაბორატორია ფუნქციონირებს.

კითხვა: 

 საზღვარგარეთ უფრო სანდო ხომ არ არის ანალიზის გაგზავნა ვირუსის არსებობაზე და რომელი კლინიკებიდან ხდება ეს?

 
პასუხი: 

დღეისათვის შესაძლებელია გამოკვლევისათვის  პაციენტის სისხლი გაგზავნილი იქნას საზღვარგარეთ, მათ შორის ნებისმიერ ჰეპატოლოგიურ ცენტრში და/ან ლაბორატორიაში.

ამისათვის არსებობს რამდენიმე  სპეციალიზებული სამედიცინო დაწესებულება – საზღვარგარეთ მკურნალობისა და გამოკვლევის ცენტრი.

 რაც შეეხება სამედიცინო კვლევების სანდოობას, ჩვენს ლაბორატორიებში ჩატარებული კვლევების სიზუსტე მრავალჯერადი პარალელური გამოკვლევითაა დადასტურებული.

სკეპტიკოსებს აქვთ საშუალება კიდევ ერთხელ თავად დარწმუნდნენ ზემოაღნიშნულის სისწორეში. [ვირუსოლოგიური კვლევის შედეგები გადაამოწმონ სხვა ქვეყნების  ლაბორატორიებში

კითხვა: 

რა თანხა ჯდება ანალიზის გაკეთება საქართველოში?

 
პასუხი: 

პირველადი სეროლოგიური კვლევა [რითაც მხოლოდ C ვირუსით ინფიცირების ფაქტის დადგენაა შესაძლებელი] არაა ძვირადღირებული, ტესტ-სისტემის ხარისხზე დამოკიდებულებით  მისი ფასი 10 დან 20 ლარამდეა. 
რაც შეეხება  C ვირუსის რაოდენობის განსაზღვრას სისხლში  და მისი ტიპის დადგენას – ეს რთული, მოლეკულურ- გენეტიკური კვლევებით  ხდება და მათი ღირებულებაც შესატყვისად გაცილებით მაღალია [რამდენიმე ასეული ლარი].

 

კითხვა: 

გავიგე, რომ C ჰეპატიტი მაქვს. ახლა რა ვქნა - სად და რომელ ჰეპატოლოგთან მივიდე, როგორ შევარჩიო კლინიკა და ექიმი, როგორ მოვხვდე მასთან?

 
პასუხი: 


ვირუსით ინფიცირების ფაქტის დადგენის შემდეგ ერთმნიშვნელოვნად, აუცილებელია მიმართოთ ექიმ სპეციალისტს, რომელიც დაგიდგენთ დაავადების სტადიასა და ღვიძლის დაზიანების ხარისხს, დახმარებას გაგიწევთ დაავადებით გამოწვეული პრობლემების მართვაში, გასწავლით როგორ შეინარჩუნოთ და გაიუმჯობესოთ ღვიძლის ფუნქცია და ა.შ. არჩევანი დიდია, ჩვენს ქვეყანაში ათეულობით ლიცენზირებული მაღალი კვალიფიკაციის ინფექციონისტი- ჰეპატოლოგია.
 
მათ შორის არჩევანის გაკეთებაში კი ალბათ ყველაზე უკეთ  ანალოგიური პრობლემით ახლობლები დაგეხმარებიან. თქვენ ნებისმიერ დროს შეგეძლებათ შეიცვალოთ ექიმი, თუ მასთან ურთიერთობით პირველადი მოლოდინი არ გაგიმართლდათ. ჩვენს ქვეყანაში სასურველ ექიმთან მოხვედრა არაა რთული, საჭიროა მიხვიდეთ სამედიცინო დაწესებულებაში და ჩაეწეროთ მიღებაზე.

 

კითხვა: 

სად იყიდება წამლები, არის ეს მედიკამენტები თავისუფალ გაყიდვაში?

 
პასუხი: 

C ჰეპატიტის სამკურნალო თანამედროვე ანტივირუსული პრეპარატები იყიდება ქვეყნის სააფთიაქო ქსელში. მათი შეძენა სპეციალური დანიშნულებით შესაძლებელია დიდ ქალაქებში: თბილისი, ქუთაისი, ბათუმი და რა თქმა უნდა არაა თავისუფლად ხელმისაწვდომი.
  თვითნებურად მათი გამოყენებით ადამიანის ორგანიზმს შესაძლებელია მძიმე და გამოუსწორებელი, სიცოცხლისათვის საშიში ზიანი მიადგეს. ანტივირუსული მკურნალობა ინიშნება და მკურნალობის მართვა ხდება მხოლოდ მაღალი კვალიფიკაციის ექიმ-სპეციალისტის მიერ.

 

კითხვა: 

საშუალოდ რა ღირს ექიმ-ჰეპატოლოგის კონსულტაცია?

 
პასუხი: 

ექიმის კონსულტაციის ფასებს ადგენს სამედიცინო დაწესებულების ხელმძღვანელობა.  ამის გამო სხვადასხვა დაწესებულებაში სხვადასხვაა. საშუალოდ, პირველადი კონსულტაციის ფასი 30-50 ლარია.
 

 

კითხვა: 

რა თანხა ჯდება მკურნალობა?

 
პასუხი: 

ინფიცირებულის ანტივირუსული მკურნალობით შესაძლებელია  ორგანიზმის ვირუსისაგან განთავისუფლება და ღვიძლის დაზიანების პროგრესირების შეჩერება. ეს ძვირადღირებული მკურნალობაა და ვირუსის გენოტიპზე დამოკიდებულებით 10 000-20 000 ლარი ჯდება.

კითხვა: 

რამდენად შესაძლებელია C ჰეპატიტის თვითგანკურნება?

 
პასუხი: 

C ვირუსით ინფიცირების შემდეგ 20% (ანუ ხუთიდან ერთი ინფიცირებული)  დაავადების მწვავე ფაზაში - ინფიცირებიდან 6 თვეში თავისუფლდება ვირუსისაგან, ანუ თვით ინკურნება. დანარჩენ 80%-ში დაავადების გამომწვევი ორგანიზმში მთელი ცხოვრების მანძილზე რჩება – ვითარდება ქრონიკული ინფექცია. ქრონიკული C ჰეპატიტით ავადმყოფის თვითგანკურნება შეუძლებელია. 

კითხვა: 

რამდენად რეკომენდებულია ბალახეული წამლები და მათი მოხმარება ხომ არ მოიტანს ფატალურ შედეგს?

 
პასუხი: 

რა თქმა უნდა, არა, თუ იგი ექიმ-სპეციალისტის მიერაა დანიშნული.

კითხვა: 

რას ნიშნავს A და B ჰეპატიტის ვირუსები და შესაძლებელია თუ არა, რომ რომელიმე გადაიზარდოს C ჰეპატიტში?

 
პასუხი: 

A, B, C  და კიდევ ორი სხვა (D და  E) ღვიძლის ანთების – ჰეპატიტის გამომწვევი ვირუსებია. ისინი  ერთმანეთისაგან სრულიად განსხვავებულნი არიან. A,B,C,D და E ჰეპატიტები სხვადასხვა დაავადებებია, თითოეული მათგანის განვითარებისათვის ორგანიზმში შესაბამისი ვირუსი უნდა მოხვდეს, მათი ერთმანეთში გადაზრდა შეუძლებელია. 

კითხვა: 

მაქვს C და B ჰეპატიტი. შეიძლება თუ არა ფიზიკური დატვირთვა და ვარჯიში?

 
პასუხი: 

თუ თქვენი დაავადება არაა ღვიძლის ციროზის სტადიაზე, თქვენთვის რეკომენდებულია ზომიერების ფარგლებში ფიზიკური აქტივობა: დღეში 1 საათი ცურვა, ან ძუნძულით სიარული, ან ფიტნეს-ცენტრში ვარჯიში. 

კითხვა: 

C ჰეპატიტის დროს შეიძლება თუ არა ნატურალური, შავი ღვინის დალევა (რომელსაც სამკურნალოდ ხმარობენ) და კიდევ, წელიწადში ერთხელ ალკოჰოლის დიდი რაოდენობით მიღება რამდენად ავნებს ღვიძლს?

 
პასუხი: 

ნატურალური შავი ღვინო შეიცავს უამრავ ბიოლოგიურად აქტიურ, ორგანიზმისათვის სასარგებლო ნივთიერებას: მინერალებს, ვიტამინებს, ანტიოქსიდანტებს და სხვა. ამასთან, შავი ღვინო, ისევე როგორც ყველა სხვა ალკოჰოლური სასმელი, შეიცავს ეთილის სპირტს, რომელიც ღვიძლში იშლება, მისი დაშლის პროდუქტი აცეტალდეჰიდი კი ღვიძლისათვის ნომერი 1 შხამია და მისი უჯრედების სიკვდილს – ნეკროზს იწვევს. ამის გამო, ჰეპატიტით პაციენტებს ეკრძალებათ ნებისმიერი ალკოჰოლის შემცველი სასმელის მიღება (მათ შორის ლუდისაც). ერთხელ დიდი რაოდენობით ალკოჰოლის მიღება ძალზე მავნებელია ღვიძლისათვის.

 

კითხვა: 

მკურნალობა გავიარე 2013 წლის ოქტომბერში. ექიმის თქმით - ანალიზები კარგია. რატომ ვგრძნობ თავს ცუდად: სულ დაღლილი ვარ, მაწუხებს მაღალი წნევა, თავის ტკივილი, თავბრუსხვევა... თვალებში ყველაფერი ორმაგად მეჩვენება, ყველაზე მეტად ზურგი მტკივა... ექიმო, რა ხდება?

 
პასუხი: 

გირჩევთ, მიმართოთ ექიმ-თერაპევტს. თქვენი ჩივილები გულ-სისხლძარღვთა და ნერვული სისტემების სავარაუდო დაზიანებაზე მიუთითებს.

კითხვა: 

ანალიზი ავიღე 2 სხვადასხვა კლინიკაში. ერთგან დადებითი იყო  პასუხი და მეორეგან - უარყოფითი. რომელს უნდა ვენდო და დავიჯერო, სად ავიღო ანალიზი, მირჩიეთ.

 
პასუხი: 

გირჩევთ, თავი დაანებოთ თვითნებურად ანალიზების კეთებას და მისი შედეგების ინტერპრეტაციის მცდელობას. პირველ რიგში, მიმართეთ სპეციალისტს, ინფექციონისტ-ჰეპატოლოგს, რომელიც გადაწყვიტავს: საერთოდ გჭირდებათ თუ არა კვლევები და თუ გჭირდებათ, რომელი; ამასთან, აგიხსნით თითოეული ლაბორატორული ტესტის სარწმუნოობასა და დიაგნოსტიკურ ღირებულებას. 

კითხვა: 

მამას აქვს C ჰეპატიტი. მაინტერესებს, იცის თუ არა ამ დაავადებამ დიარეა?

 
პასუხი: 

უშუალოდ ქრონიკული C ჰეპატიტის კლინიკურ გამოვლინებაში დიარეა არ შედის, თუმცა პაციენტების ერთ ნაწილს აქვს კუჭუკანა ჯირკვლის – პანკრეასის დაზიანება, რომლის დროსაც ხშირია დიარეა. საერთოდ, არასწორია როცა ჰეპატიტით ავადმყოფები ცდილობენ ყველა არსებული კლინიკური ნიშანი ღვიძლის დაზიანებით ახსნან. ასეთ ავადმყოფს, ისევე როგორც ნებისმიერ სხვას, შეიძლება ორგანიზმის ნებისმიერი ორგანოს, მათ შორის მაგ. ნაწლავების რაიმე პათოლოგია განუვითარდეს.

კითხვა: 

გამარჯობა, მე მაქვს B, C და D ანუ (დელტა) ჰეპატიტები. არის თუ არა რაიმე ინფორმაცია მკურნალობის ან კონსულტაციის სახით. მე როგორც ვიცი, საქართველოში დელტას არ კურნავენ ანუ ინტერფერონი არ რეაგირებს მასზე. არის თუ არა ინფორმაცია საზღვარგარეთ მკურნალობის შესახებ. (მე როგორც გავიგე, თურქეთში,საფრანგეთსა და გერმანიაშია სერიოზული ჰეპატოკლინიკები).

 
პასუხი: 

როგორც თქვენი შეკითხვიდან მივხვდი, ინფიცირებული ხართ 3 ვირუსით. ასეთ შემთხვევაში პირველ რიგში უნდა დაადგინოთ ამ ეტაპზე რომელ ვირუსს მიჰყავს თქვენი დაავადება - რომელი ვირუსია აქტიური. ამის შემდეგ შემოგეთავაზებათ შესაბამისი მკურნალობა. რაც შეეხება B, C, D ჰეპატიტების ანტივირუსული მკურნალობის სქემებს, საერთაშორისო რეკომენდაციები ჩვენთვის, თურქეთის, გერმანიისა და სხვა ნებისმიერი ქვეყნის ჰეპატოლოგიური კლინიკისათვის ერთი და იგივეა. სხვადასხვა ქვეყანაში, მაგ. გერმანიაში,  საფრანგეთში მიმდინარეობს ბევრი ახალი, ჯერ დაურეგისტრირებელი პრეპარატის კლინიკური გამოცდა, რაშიც ხშირად ერთვებიან ხოლმე ამ ქვეყნებში ჩვენგან ლტოლვილის სტატუსით ემიგრირებული ინფიცირებულები. ეს ნებაყოფლობით ხდება და ეს მათი ნებაა. ამ ახალი პრეპარატებიდან საბოლოოდ მხოლოდ ნაწილი ხვდება ხოლმე საერთაშორისო რეკომენდაციებში.

 

 

კითხვა: 

გამარჯობა. 2 წლის წინ გავიგე შემთხვევით, რომ B და C ჰეპატით ვართ დავადებული მე და ჩემი ცოლი და პატარა შვილიც, რომელიც სულ 4 წლისაა. ჯანდაბას ჩემი თავი, ცოლიც შეეგუა ამას, მაგრამ რა გზას დავადგეთ, ბავშვს როგორ ვუმკურნალოთ და საერთოდ, რა ასაკიდან დავიწყოთ მისი მკურნალობა და არის თუ არა საქართველოში, ისევე როგორც სხვა ქვეყნებში, უფასო ან შეღავათიანი მკურნალობა ბავშვებისთვის მაინც? 

 

 
პასუხი: 

თქვენი წერილები ჩვენთან ანონიმურად მოდის და ამდენად, არა გვაქვს საშუალება, რომ პირადად გიპასუხოთ. ამიტომ, ამ წერილის ავტორს ვთხოვთ, რომ შეგვეხმიანოს "C ჰეპატიტის პაციენტთა გაერთიანების" ცხელ ხაზზე: 2 904 400; ან მოგვწეროს მისამართზე: hepc.tbilisi@gmail.com

კითხვა: 

რა აზრი აქვს გენოტიპის დადგენას, თუ ვერ ვიმკურნალებ?

 
პასუხი: 

თუ ჯერჯერობით მკურნალობის ჩატარებას ვერ ახერხებთ, გენოტიპის დადგენა დაგეხმარებათ დაავადების პროგრესირების რისკის განსაზღვრაში. მაგალითად, ვირუსის 2a/2c გენოტიპის დროს პროგნოზი უკეთესია, ვიდრე 1a ან 1b გენოტიპებით ინფიცირებისას.

კითხვა: 

C ჰეპატიტის დადგენის შემდეგ, თბილისის გარდა საქართველოს რომელ ქალაქში შეიძლება ჩავიტარო ღვიძლის საფუძვლიანი და სანდო გამოკვლევა და რომელ კლინიკებში?

 
პასუხი: 

ლაბორატორული გამოკვლევების ჩატარება შესაძლებელია ბათუმისა და ქუთაისის კლინიკებშიც.

კითხვა: 

ხომ არ არის რაიმე სიახლე C ჰეპატიტის პრევენციაზე სახელმწიფოს მხრიდან?

 
პასუხი: 

C ჰეპატიტი რაიმე განსაკუთრებულ პროფილაქტიკურ ღონისძიებებს არ საჭიროებს. პროფილაქტიკის ღონისძიებები საერთოა ყველა სისხლკონტაქტური ინფექციისათვის [B,C,D ჰეპატიტები, შიდსი] და მისი დაცვა აუცილებელია ყველა სამედიცინო მანიპულაციის ჩატარებისას.

კითხვა: 

იგეგმება თუ არა სახელმწიფოს მიერ C ჰეპატიტის მკურნალობის დაფინანსება?

 
პასუხი: 

როგორც ვიცი, დაგეგმილია იაფი ანტივირუსული პრეპარატების შემოტანა და/ან  ჩვენთან წარმოება. სავარაუდოდ, იქნება მკურნალობის ხელშეწყობაც. თუმცა, არა მგონია შესაძლებელი გახდეს ყველა ინფიცირებულის მკურნალობის ხარჯების სახელმწიფოს მიერ ანაზღაურება. ეს მაინც ძალზე დიდი თანხებია  ჩვენთან  მოსახლეობის ინფიცირების ძალზე მაღალი მაჩვენებლიდან გამომდინარე.

 

კითხვა: 

შეიძლება თუ არა ვირუსის დაძინება, ან ანტისხეულების შეყვანა ჯანმრთელი ადამიანის ორგანიზმში, რათა ვირუსი არ გადაედოს? ცოლის მოყვანას ვაპირებ და ძალიან ვნერვიულობთ მეც და ჩემი საცოლეც.

 
პასუხი: 

მხოლოდ ანტივირუსული ქიმიოთერაპიითაა შესაძლებელი  C ვირუსის ელიმინაცია –აღმოფხვრა ადამიანის ორგანიზმიდან. რაც შეეხება ვირუსის საწინააღმდეგო ანტისხეულებს, სხვა ინფექციური დაავადებისაგან განსხვავებით, ამ დაავადების თავისებურებაა ის, რომ ვირუსის საწინააღმდეგო ანტისხეულებს არ შეუძლიათ ვირუსის განეიტრალება, უფრო მეტიც,  მათი არსებობა ორგანიზმში დაავადების აქტიური სტადიის მაჩვენებელია.

კითხვა: 

შარშან აღმომაჩნდა ბუსუსოვან უჯრედოვანი ლეიკემია. ვიმკურნალე და მითხრეს, რომ C ჰეპატიტიც გქონიაო (გენოტიპი 3). რას მირჩევთ?

 
პასუხი: 

თუ თქვენ სრულად განიკურნეთ ლეიკემიისაგან და ქიმიოთერაპია აღარ გჭირდებათ, შესაძლებელია ჩაიტაროთ ინტერფერონოთერაპია [თუკი ეს აუცილებელია].

კითხვა: 

მასწავლეს სოდიანი წყლით მკურნალობა. როგორ მოქმედებს ღვიძლზე საჭმელი სოდა?

 
პასუხი: 

C ჰეპატიტით პაციენტებს დაავადების შორსწასულ სტადიაზე უნვითარდებათ ორგანიზმის მჟავა-ტუტოვანი წონასწორობის დარღვევა, მჟავიანობის მომატება - ე.წ. მეტაბოლური აციდოზი. ამის შედეგად მათი მდგომარეობა მნიშვნელოვნად უარესდება. ასეთ პაციენტებს სტაციონარის პირობებში ვენაში უსხამენ სოდის (ნარტიუმის ბიკარბონატის) სტერილურ ხსნარს.  საერთოდ, ჰეპატიტით პაციენტებს ვურჩევთ ზომიერების ფარგლებში (დღე-ღამეში 0,5 ლ),  გაზგასული ტუტე მინერალური წყლების მიღებას, ასეთებია: ნაბეღლავი, ლიკანი და სხვ. საჭმელი სოდის სისტემატურად მიღება არ შეიძლება, მავნებელია.

 

კითხვა: 

გვიან გავიგე დაავადების შესახებ. მაქვს დეკომპენსირებული ციროზი, ხშირად - ასციტი. რა შეიძლება გაკეთდეს ჩემი ჯანმრთელობის საერთო მდგომარეობის გასაუმჯობესებლად?

 
პასუხი: 

მუდმივად აკონტროლეთ დაავადების სხვა გართულებებიც: პორტული ჰიპერტენზია, ენცეფალოპათია, თირკმელების ფუნქცია, ასევე სისხლში ალბუმინისა და პროთრომბინის შემცველობა. ყველა ეს დარღვევა თავის შესატყვის თერაპიას საჭიროებს, მათი კორექციით შესძლებთ საერთო მდგომარეობის სტაბილიზაციას და გამოსწორებასაც კი. 

კითხვა: 

დაავადებულის ოჯახის წევრებმა რამდენ ხანში ერთხელ უნდა აიღონ ანალიზი შემოწმების მიზნით?

 
პასუხი: 

ინფიცირებულის ოჯახის წევრებმა საკმარისია მხოლოდ ერთჯერადად, ოჯახის რომელიმე წევრის ინფიცირების ფაქტის დადგენისას აიღონ ანალიზი. ინფიცირებულთან ერთად ერთ ოჯახში ცხოვრება საშიში არაა, თუ ოჯახის წევრები იცავენ ჰიგიენის ელემენტარულ  წესებს [ყველას აქვს საკუთარი პირადი ჰიგიენის ნივთები: კბილის ჯაგრისი, საპარსი, ფრჩხილის მაკრატელი და სხვ.] დაავადება არ გადადის საერთო ხმარების ჭურჭლით, მათ შორის წყლის ჭურჭლით, საერთო აბაზანითა და ტუალეტით, საერთო ხმარების თეთრეულით.

 

 

კითხვა: 

ეჭვი მაქვს, რომ C ჰეპატიტი გადამედო. სად შეიძლება ანალიზის აღება თბილისში?

 
პასუხი: 

C ვირუსით ინფიცირებაზე ეჭვის შემთხვევაში პირველ რიგში აუცილებელია ჩაიტაროთ ლაბორატორული კვლევა სისხლში ვირუსის საწინააღმდეგო ანტისხეულების აღმოსაჩენად. ეს მარტივი  პირველადი სეროლოგიური კვლევაა და მისი ჩატარება შესაძლებელია პრაქტიკულად ყველა, როგორც სახელმწიფო, ასევე კერძო დიაგნოსტიკურ ცენტრში. დადებითი პირველადი  რეაქცია აუცილებლად საჭიროებს  კვლევის მაღალმგრძნობიარე მეთოდით დადასტურებას- კონფორმაციას.
მისი ჩატარება  შესაძლებელია რამდენიმე სპეციალიზებულ ლაბორატორიაში, მათ შორის ინფექციური პათოლოგიის ცენტრის, შიდსის, “ციტოს”, “ინტერკლინიკის”, “ლიმბახის” და ა.შ.

 

კითხვა: 

ახლო მომავალში ვაპირებ ჩავიტარო მკურნალობა ინტერფერონით და რიბავირინით. მაინტერესებს, რამდენ ნემსამდე მექნება გვერდითი მოვლენები?

 
პასუხი: 

ანტივირუსული მკურნალობის დროს სხვადასხვა გვერდითი ეფექტი მკურნალობის სხვადასხვა პერიოდებში ვითარდება. ასე მაგალითად, “გრიპის მსგავსი“ სინდრომი – ტემპერატურის მომატება, შემცივნება, კუნთებისა და სახსრების ტკივილი უფრო ძლიერადაა გამოხატული ინტერფერონის პირველი ინექციების დროს და ნაკლებად - მკურნალობის ბოლოს, მაშინ როცა ნევროლოგიური გართულებები – დეპრესია, შფოთვა უფრო მოგვიანებით პერიოდში გვხვდება.

კითხვა: 

მკურნალობას ვიტარებ ინტერფერონით.დანიშნული მაქვს ექვს თვიანი კურსი. გავიკეთე 14 ნემსი. რუსეთიდან ახლობელმა გამომიგზავნა პეგინტრონი. შეიძლება მკურნალობა გავაგრძელო პეგინტრონის ნემსით?

 
პასუხი: 

მკურნალობის პერიოდში პრეპარატის შეცვლა სასურველი არაა. ამასთან ერთად, დარწმუნებული უნდა იყოთ თქვენთვის გამოგზავნილი პრეპარატის ვარგისიანობაში, არის თუ არა დაცული მისი შენახვის პირობები [პეგილირებული ინტერფერონები ბიოლოგიური პრეპარატებია და კარგავენ აქტივობას 24 საათზე მეტი ხანი 4-5 გრადუსზე მაღალ ტემპერატურაზე ყოფნის, ასევე გაყინვის შემთხვევაში].

კითხვა: 

საფრანგეთში დანერგილი ახალი მეთოდის - ვირუსის გაყინვის შესახებ რა ინფორმაცია გაქვთ?

 
პასუხი: 

კომბინირებული ანტივირუსული მკურნალობით წყდება ვირუსის გამრავლება, ანუ იგი აღარ აზიანებს ღვიძლს. რაც შეეხება სიახლეებს ანტივირუსულ თერაპიაში, ამჟამად ორ ათეულამდე C ჰეპატიტის სამკურნალო მაღალეფექტური ახალი ანტივირუსული პრეპარატი გადის კლინიკურ კვლევებს, მათ შორის საფრანგეთშიც. უახლესი მომავლის ანტივირუსული სტრატეგია აღარ იქნება ინტერფერონზე დაფუძნებული, იქნება ორი ან სამი [მუშავდება რამდენიმე სქემა] პირდაპირი მოქმედების ანტივირუსული პრეპარატი. ყველა ახალი პრეპარატი აბების სახითაა, ამასთან მკურნალობის კურსი ყველა გენოტიპისათვის არ იქნება 3-6 თვეზე მეტი.

კითხვა: 

მაქვს ქრონიკული C ჰეპატიტი (ინტერფერონით არ ვმკურნალობ), გამიმწვავდა ბუასილი, რამდენად საშიშია ქირურგიული ჩარევა?

 
პასუხი: 

ქრონიკული C ჰეპატიტით პაციენტისათვის რაიმე ოპერაციული ჩარევა საშიში არაა.